Nu 21. oktobra leidz 1. novembram Reigys Kongresu noma Jaunajā i Lelajā zalā nūtiks kasgadejais muzykys i muokslys festivals “BIĻDIS”, kurā pīsadaleis ari vairuoki latgalīšu muziki i grupys.

22. oktobrī 19.00 nūtiks jaunūs dzīsminīku koncertu, kuru vadeis latgalīšim jau labi zynomīs muziks Kārlis Kazāks, kurs itūgod bīži bejs sateikams Latgolā, nu koncertā iz skotuvis kuops ari latgalīšu dzīsmineica Laura Bicāne.

30. oktobrī 19.00 – jaunūs grupu i “BIĻŽU” veteranu kūpprojektu koncerts, kurā byus vareiba dzierdēt ari Latgalīšu kulturys Goda bolvys “Boņuks 2013” laureatus nominacejā “Goda debeja muzykā” – grupu “Ze Pikniks”, kuri sasadorbuos ar Artūru Uškānu.

Sovukuort 31. oktobrī 19.00 jau ūtrū godu piec kuortys “BIĻDĒS” sevi jau dasacejušū grupu i rodūšūs personeibu kūpprojektu koncertā pīsadaleis grupa “Dabasu Durovys”. Ka viņugod kūpā iz skotuvis kuope Daugovpiļs teatra akteri, tod itūgod jim muzykala sadarbeiba veiduosīs ar Latvejis Radejis 5 žurnalisti i raidejuma “Kolnasāta” veiduotuoju Dairu Kokoreviču. Taipat koncertā kai eipašī gosti pīsadaleis Slavanais Jersikys orkestris.