Pīktdiņ, 12. decembrī, 18.30 Daugovpiļs teatrī nūtiks A. Eikborna lugys “Kā tā otra puse mīl” (režisors J. Jonelis) pyrmizruode.

Britu dramaturga A. Eikborna luga “Kā tā otra puse mīl” ir tulkuota 30 volūduos i īstudāta daudzūs pasauļa teatrūs, kas aplīcynoj ituo dorba nūzeimeigumu lelā kulturtelpā. Tei ir paradoksala komedeja, kurā azartiski, kontrastaini i ospruoteigi teik atkluotys attīceibu peripetejis i tys, kai patīseibā tei ūtruo puse mīl.

Treis puoru attīceibys teik atspīgeļuotys kasdīniškuos, daudzim cīši atpazeistamuos i šaļtim naīrosti komiskuos situacejuos, aktualizejūt cīši filozofiskys puordūmys par tū, kai sabalansēt sovys dvēseliskuos, personiskuos vajadzeibys ar saimis, sabīdreibys noteiktuom napīcīšameibom, kai saimis apstuokļūs, sovstorpieji mijīsadorbojūt, napagaisynuot sevi, saglobuot sovu īkšejū pasauli komforta leimenī, voi i kai savīnuot teiru sirdsapziņu ar puortykušu dzeivi. Izruode rūsynoj apjaust saimis lūmu kotra cylvāka dzeivē i īspiejis, kai tū pasorguot nu uorejūs ītekmu, kurom narati pīmeit destruktivs spāks.

Izruodi caurvyn spēlis motivs – tei ir saspēle storp veirīti i sīvīti, spēle ar vuordim i klusumu / klusiešonu, cereibom i izmysumu, izalikšonu i patīsumu. Tei ir apbreinuojama ritma spēle, kod izruodis temps teik palānynuots ar stopkadrim – atkluojūt dvēselisko tyveibu storp partnerim.

Īstudiejuma vizualais ītārps veiduots poparta stilistikā, īzeimejūt ironisku i rūtaleigu konkreteibu, muzykalā ziņā īdzeivynuoti 50. godu motivi. Pasasokūt izruodis kūpejai nūskaņai, skateituojam byus vareiba apjaust trauslū robežu storp škītameibu i realitati i tū, ka mes vīns bez ūtra navaram eksistēt i atsateisteit.

Režija – J. Jonelis
Scenografeja i kostimi – L. Pavlovska
Muzykalais nūformiejums – P. Pāss
Gaismys – S. Vasiļjevs
Lūmuos: M. Korsiets, K. Veinšteina, L. Ivanova, M. Korkliša, E. Viļumovs, R. Gailums

Pyrmizruode – 12. decembrī
Tyvuokuos izruodis – 13. decembrī i 30. janvarī.