LaKuGa jau viesteja, ka 23. i 24. aprelī Rēzeknis Augstškolā nūtiks 4. storptautiskuo zynuotniskuo konfereņce “Autors. Teksts. Laikmats”, kas byus veļteita latgalīšu kulturys darbineicys, literaturys viesturneicys Ilonys Salcevičys 75 godu jubilejam. Niu izziņuota ari konfereņcis programa.

Konfereņce tiks atkluota 23. aprelī 14.00. Plenarsēdis laikā nūtiks ari tikšonuos ar literaturzynuotneicu Ilonu Salceviču.

Paraleli cytom sekcejom 23. aprelī nūtiks ari dorbs sekcejā “Literatura i nacionalī kodi (mitologeja, folklora, etnografeja, latgalīšu teksti, Latvejis cytu tautu i cytu nūvodu literatura)”, kurā byus vareiba klauseitīs Ilgys Šuplinskys (“Martys Skujis sugesteja latgalīšu dzejā”), Sandrys Vuorkalis (“O. Kūkuoja dzeivis stuosts kruosojamā gruomotā “Lobs ar lobu sazatyka” ar zeimejamim aizdavumim”) i Antrys Kļavinskys (“Etnonimi Jezupa Macileviča dorbā “Pawujciejszona un wyssajdi sposobi diel’ ziemniku Łatwiszu””) referatus.

19.00 paradzāta tikšonuos ar dzejneicu Annu Rancāni, nu 19.20 – 20.30 paradzāti ari jaunūs autoru dorbu prīškskaitejumi, kur varēs dzierdēt ari Latgolys autoru – Anitys Mileikys, Ingys Kaļvys i Oskara Orlova – dorbus.

24. aprelī sekcejā “Literatura i nacionalī kodi (mitologeja, folklora, etnografeja, latgalīšu teksti, Latvejis cytu tautu i cytu nūvodu literatura)” tiks skaiteiti Vladislava Malahovska (“Aloizeja Broka Jaunuos Dereibys tulkuojuma vīta i nūzeime cytu latgaliski tulkuotūs evaņgeleju kontekstā”) i Sandrys Ūdris (“Frazeologejis ekspresivitate latgalīšu dramaturgejā”) referati par Latgolys tematiku.

Sovukuort studentu referatu vydā byus ari Ausmys Spruktis referats “Putynu simboli Annys Rancānis dzejā”.

Konfereņce tiks nūslāgta ar Roberta Mūka memorialuo muzeja atkluošonys apmekliejumu Rībeņūs.

Pylna konfereņcis programa.