Kulturys ministreja uzsuokus aktivu dorbu pi Latvejis symtgadis svātku programys izstruodis. Tuos ītvorus planavuots izveiduot Latgolys kongresa symtgadis Reiceibys grupu.

Vīns nu nūzeimeiguokajim Latvejis vaļsts dybynuošonys aizsuokumim ir Latgolys kongress 1917. godā. Tuo laikā pyrms 100 godim Rēzeknē nūtyka pyrmuo demokratiski īvālātu Latgolys latvīšu puorstuovju sanuoksme, kurā tyka nūlamts, ka Latgolys, Vidzemis i Kurzemis latvīši ir vīna tauta i Latgolai juoapsavīnoj ar puorejim tūpūšuos Latvejis vaļsts nūvodim vīnā zemē. Latgolys kongresa symtgadis reikuošona īsazeimej kai vīna nu byutiskuokajom nūtikšonom Latvejis symtgadis atzeimiešonys programā, informej Kulturys ministreja.

Ituo pasuokuma veiksmeigai sagataveišonai i nūrisis nūdrūšynuošonai vajadzeiga vaļsts, pošvaļdeibu i navaļstisku organizaceju sovstarpieja sadarbeiba, par tū Kulturys ministrejis Latvejis vaļsts symtgadis birojs veiduos Reiceibys grupu. Latgolys kongresa symtgadis Reiceibys grupā dorbuosīs puorstuovji nu Latgolys leluokajom pošvaļdeibom, augstškolom, kulturys institucejom i aktivuokajom navaļstiskajom organizacejom.

Pyrmuo sasatikšona beja 2. junī Rēzeknē, kurys laikā kulturys ministre Dace Melbārde īpazeistuonuoje ar ministrejis vīzeju par Latvejis symtgadis nūtikšonom, sovukuort kluotasūšī puorstuovji dalejās ar sovom puordūmom i redzīni par nūtikšonom Latgolā symtgadis programys ītvorūs.