Jauna dzejūļu gruomota bārnim latgaliski
Rēzeknis piļsātys svātku ītvorūs 2.augustā 12.45 Rēzeknis Festivala parkā (Piļs īlā 7) nūtiks dzejneicys Inetys Atpilis-Juganis dzejūļu gruomotys bārnim “Otkon giunu sapynus” attaiseišona. Gruomota radeita kūpā ar meitu Agnetu Jugani (6 godi), kura ilustrējuse mamys dzejūļus, kai ari gruomoteņā īvītuotys obeju sarunys par kotru dzejūli. Rēzeknis nūvoda vokaluos studejis “Skonai” izpiļdejumā vairuoki gruomotā īkļautī dzejūli izskanēs ari dzīsmēs.
Sapynus var giut, ka tev ir sapynu giviejs, voi ari tod, ka tu īsadrūšynoj, ka tu sapņoj, ka tu dori vysu, kū gribi. Ka tu esi maneigs, tod tūs var giut iz kotra sūļa vysu cauru dīnu i dorbūs, i (na)dorbūs. Dzejneica Ineta Atpile-Jugane itūreiz sovus i meitenis Agnetys sapynus ir sagivuse, kab duovuotu mozajim skaiteitojim i jūs vacuokim sovā jaunajā dzejūļu gruomotā “Otkon giunu sapynus”. Gruomotā īvītuoti dzejūli latgalīšu volūdā, tūs ilustracejis – Agnetys interpretacejā, sovukuort sarunys par kotru dzejūli atkluoj i bārna redziejumu i dzejūļa izpratni, i ruoda dzejneicys – ilustratoris, mamys – meitys, bārna – pīaugušuo redzīni iz vuordūs ītārptū. I kūpeigai veiduota gruomota, i sarunys par dzejūlim ir veids, kai nūgiut sapynu par bierneibu, kuopieceiša vacumu, kas paskrīn tik dreiži! Pavadeit breivū laiku kūpā ar bārnu var ari itai – rodūši i īdvasmojūši i sev, i cytim! I kaida sapyna nūgiušona roda vys jaunus sapynus i gribiešonu tūs vaicuot.
“Otkon giunu sapynus” ir dzejneicys I. Atpilis-Juganis pyrmuo dzejūļu gruomota bārnim i pyrmuo dzejūļu gruomota latgaliski. Gruomota veiduota Mozūs kulturys i turisma projektu konkursa ītvorūs, kū finansej Rēzeknis piļsātys dūme i organizej pošvaļdeibys agentura “Rēzeknes Kultūras un Tūrisma centrs”. Gruomotu izdavuse Latgolys entuziastu grupa “Biļdis”, tei radeita SIA “Latgales Druka”.
Gruomotys attaiseišonys šaļtī interesentim byus vareiba satikt gruomotys autori i muokslineicu, sajimt duovonā jaunū gruomotu i dzierdēt dzīsmēs puortopušūs dzejūļus Rēzeknis nūvoda vokaluos studejis “Skonai” (jaunuokuo grupa) izpiļdejumā (vad. Guntra Kuzmina i Edgars Jukna, dzīšmu teksti –I. Atpile-Jugane, muzyka – Guntra Kuzmina).
