30. septembrī 15.00 Rēzeknis Augstškolys kopejneicā “Augstskolas dzintars” nūtiks rodūši literara piecpušdīne, veļteita gruomotys “Rositten” attaiseišonys svātkim.

Itūgod Rēzekne svietej 730 godu jubileju, i par gūdu tam literatu rodūšuos kūpys “Latgales ūdensroze” dalinīki raksteja stuostus i dzeju, kas veļteiti piļsātai.

Deveņu autoru – Marutys Avramčenko, Betejis Bergys, Juoņa Bruga, Ivetys Dimzulis, Arvīda Gļaudys, Ingys Kaļvys, Elvīrys Pinkys, Edgara Stepiņa i Aijis Zujis – rodūšī dorbi apkūpuoti gruomotā “Rositten”. Dorbi stuosta i par Rēzekni aba Rositten 1287. i 1288. godā, i par nūtikšonom 14. godsymtā, kas sasavynuši ar tagadni; i par Latgolys Muoru, par Rēzeknis piļskolnu, par GORU i cytom vītom.

Tikū itei gruomota izguojuse, tū izdeve Latgolys Kulturys centra izdevnīceiba. Par gruomotys vuoka dizainu pasaryupejuse Stella Elksne, gruomotys vuokam izmontuota Eduarda Utāna foto, nu redaktore ir Valentina Unda.

Gruomota “Rositten” izdūta ar Rēzeknis pošvaļdeibys agenturys “Rēzeknes Kultūras un tūrisma centrs” atbolstu. Lelu paļdis par atbolstu literati soka agenturai i tuos direktorei Jūlejai Danilinai, kai ari vysim, kuri īguļdejuši dorbu tuos radeišonā.