“Kaneva Cold” debitej muzykā ar dzīsmi “Solts”
Jauna latgalīšu muzykala apvīneiba “Kaneva Cold” pīduovoj dzīsmis “Solts” videoklipu.
Grupys sastuovā pagaidom ir treis dalinīki: Guntars Poplavskis, Edijs Rancāns, Jurgis Lipskis.
Kai soka poši dalinīki, jī suok tik niule, deļtam dorba nuokūtnei natryukst. “Pošim pateik dažaida muzyka, suocūt nu klasiskuos da roka i metala – vyss atkareigs nu gorastuovūkļa. Vīnā šaļtī spielejam melanholejis pilnys baladis, a cytā varam tikt da akustiskuo metala. Nuokūtnis cereibys ir vysaidys, ari klusūs sapynu natryukst. Niu struodojam ari pi cytu dzīšmu, kuruos ceram ari piec laiceņa nūdūt klauseišonai.”
Deļkam taišni “Solts”? “Dzīsme “Solts” roduos laiceņu īprīšk – paguojušajā zīmā, nu ar dūmom par rudini, deļtam tai ir divejis nūzeimis. Vīna – ka zīmys soltums ir skaistys melanholejis pylns. Ūtra – ka rudiņs ir tys laiks, kod otkon palīk vāss, i cylvāka sirds snīdzās piec ūtrys dvēselis.”
Video tics filmāts Reigys gaišajuos i tymsajuos īluos i dīnā, i vokorā. Par klipa filmiešonu i apstruodi “Kaneva Cold” pasasoka Denielam Kuļko.
