28. februarī 11.00 Reigā, izstuožu centrā Kīpsolā, Latvejis Gruomotu izstuodis laikā nūtiks sasatikšona ar teatra zynuotneicu Silveju Geikinu i akterim sarunā par gruomotu “Daugavpils teātris”, informej apguoda “Mansards” puorstuovs Arvis Ostrovskis.

Daugovpiļs teatris – vīneigais profesionalais teatris Latvejis austrumu regionā – aizvoda sovu 29. sezonu i par vīnu nu golvonajom nūtikšonom itūsezon skaita teatra kritikis, muokslys zynuotneicys Silvejis Geikinys gruomotys “Daugavpils teātris” izīšonu. Nu Latvejis teatrim vīneigi par Daugovpiļs teatra viesturi da šam nabeja pīraksteits leluoks pietejums. Te Eiropys leiminī trupu cieļs Pīters Krilovs, iz izruodem braukuse “vysa Reiga”; niu ituo teatra zvaigznis spielej Jaunajā Reigys teatrī i cytur. Daugovpiļs teatra skotuve i viesture var lepuotīs ar izcilim režisorim i akterim, suocūt ar Otīleju Mucenieci, kura nazkod struoduojuse kūpā ar Raini, turpynojūt ar Sergeju Rodlovu, kas piec Sibira atsagrīzs i spūdrai izveds Šekspira dorbus, beidzūt ar Annu Eižvertiņu i jau pīmynātū Pīteri Krilovu. Gruomotu papyldynoj kartenis i boguoteigs personu ruodeituojs.

Gruomotys autore S. Geikina (1939) ir beiguse Dailis teatra 3. studeju (1962) i Moskovys Teatra muokslys institutu (1967), bejuse E. Smiļga Teatra muzeja vadeituoja (1980-1987), laikroksta “Literatūra un Māksla” Teatra nūdalis vadeituoja (1988-1995). Nu 1969. goda S. Geikinys roksti publicāti laikrokstā “Literatūra un Māksla”, žurnalā “Māksla”, almanahā “Teātris un Dzīve”, žurnalā “Teātra Vēstnesis”. Jei sastatejuse i sarakstejuse īvodu gruomotai “Ironiskais romantiķis Valentīns Skulme” (1997), gruomotu “Noslēpumainā Ļena” (par aktrisi Helenu Romanovu, 1999), “Klētnieki ar grimu bez grima” (2006) i “Jaunatnes teātris”(2011) autore. Gruomotys zynuotniskī redaktori ir Dr. philol. Raimonds Briedis i Dr. art. Leiga Ulberte. Gruomotys pyrmuo attaiseišona nūtyka Daugovpiļs teatrī 13. novembrī, nu Latvejis Gruomotu izstuodē ar apjūmeigū monografeju paradzāts īpazeistynuot leluoku auditoreju.

Atguodynuosim, ka Latvejis Gruomotu izstuode 2016 Reigā, izstuožu centrā Kīpsolā, nūtiks nu 26. da 28. februara. Kai kotru godu, ar latgalīšu gruomotu goldu izstuodē pīsadaleis ari bīdreiba “Latgolys Studentu centrs”, pīduovojūt vīnuvīt latgalīšu literaturu, gruomotys latgaliski i par Latgolu, kai ari suvenirus i latgalīšu muzykys diskus.

26. i 27. februarī izstuode apmaklātuojim byus attaiseita nu 10.00 da 18.00, nu 28. februarī nu 10.00 da 17.00. Ari itymā godā dorbuosīs gruomotu mainis punkts.

Foto: publicitatis karteņa