24. aprelī vysus muokslys cīneituojus gaideis eipaša nūtikšona – jauni Marka Rotko originaldorbi Daugovpilī. Originali i vairuokys vīteja mārūga i storptautyskuos izstuodis byus apsaveramys, svietejūt trešū Daugovpiļs Marka Rotko muokslys centra dzimšonys dīnu.

Tyvojās nūslāgumam pyrmūs treis godu cykls, kod Daugovpiļs Marka Rotko muokslys centrā vairs tik da 10. apreļa īspiejams apsavērt pasauļslovonuo abstraktuo ekspresionista Marka Rotko dorbus, kurī iz itū periodu tyka deponāti nu Keitys Rotko Prizelys i Kristofera Rotko kolekcejis. Piečuok dorbi atsagrīzs kolekcejā i varbyut tik kaids Latvejis dzeivuotuojs tūs otkon nazkod nuokūtnē varēs redzēt kaidā nu Eiropys muzeju.

Nav nūlīdzams, ka, pasasokūt ari muokslinīka vuordam, Daugovpiļs Marka Rotko muokslys centrys ir palics par vysapmaklātuokū vītu Latgolā i tics Latvejis 10 turisma vierteibu sarokstā. Daudzi skaita, ka taišni Marka Rotko gleznys ir nūzeimeiguokais, kas obligati juoradz, apceļojūt Latveju, reizē izbaudūt ari kvalitativuos maineiguos ekspozicejis, kurymuos apsaverami izcilu Latvejis i uorvaļstu muokslinīku gleznīceibys, grafikys, fotografejis, tekstilmuokslys, instalaceju i cytu muokslys medeju dorbi.

Rotko originalu ekspoziceja tyka pīduovuota kai vīneiguo ilgtermiņa pastuoveiguo i retrospektivuo izstuode Eiropā, kur apsaverami M. Rotko dorbi, kas raksturoj vysus muokslinīka daiļradis periodus. Ari jaunajā Marko Rotko dorbu ekspozicejā byus radzami retrospektivi da šam Latvejā naradzāti izcyluo meistara dorbi nu muokslinīka bārnu Keitys Rotko Prizelys i Kristofera Rotko kolekcejis. Tradicionalai byus apsaverama vīna realistiskuo perioda kompoziceja, divejis sirrealisma perioda gleznys, vīna storppūsma kompoziceja puorejā iz Rotko klasiskū gleznīceibu i divejis klasiskuo perioda kompozicejis.