Da 2. maja Latgolys Kulturviesturis muzejā  (Atbreivuošonys alejā 102, Rēzeknē) apsaverama Eduarda Utāna jubileja fotografeju izstuode, informej muzeja muokslys nūdalis vadeituoja Inese Dundure.

Eduards Utāns jau gondreiž 25 godus ir zynoms Rēzeknis sabīdreibai kai gazetys “Rēzeknes Vēstis” fotoreporters, napīkustūšs Rēzeknis piļsātys i tuos cylvāku kasdīnys i svātku īmyužynuotuojs fotošaļteņuos.

Autors dzims 1961. goda 1. aprelī Kruoslovys rajonā. Vuicejīs Rēzeknis 3. vydsškolā, piec tam – 14. Rēzeknis profesionali tehniskajā školā. Fotografiešonys muoku vuicejīs Moskovys politehnikumā, kurū absolvēja 1987. godā, sajamūt fototehnika diplomu. Piečuok nakluotīnē vuicejīs Moskovys universitatis fotožurnalistikys fakultatē.

Kai fotografs struoduojs Rēzeknis Sadzeivis pakolpuojumu kombinatā, Rēzeknis Pīna konservu kombinatā i nu 1991. gods 5. septembra struodoj gazetys “Rēzeknes Vēstis” redakcejā par fotokorespondentu.

Eduards Utāns aktivi pīsadola Rēzeknis i Latgolys fotografu izstuodēs, akcejuos i kūpeigūs plenerūs. 90. godu suokuos Latgolys kulturviesturis muzejā beja apsaveramys divejis juo personalizstuodis, kurymuos autors pīduovuoja muzeja apmaklātuojim na tik fotodorbus, nu ari sovus gleznuojumus abstrakcejis stilā.

Itai fotoizstuodei Eduards Utāns atlasejs fotografejis, kas līk atguoduot, puordūmuot, īsadvasmuot, pasmaideit, it kai seņ zynomu i parostu motivu īraudzeit neparostā gaismā voi pagrīzīnī. Autors pīduovoj īsavērt leidzcylvāku portretejumūs, emocionali i dinamiski nūgiutuos vysaidu kulturys pasuokumu ainuos, piļsātys i lauku ainovā. Autorapruot, cylvāka raksturs i īškšejais pasauļs lobuok radzams monofromā fotografejis pasnāgumā, tok svātkim, dejom i teatra izruodem pīstuov kruošņa kruosu palete. Piļsāta vokora bluozmā i senejuo piļskolna silueti rūsynoj iz naparostu i drupeit teiksmainu sižetu, kurū autors paspylgtynoj ar fototehnikys i fotografejis apstruodis vareibom.