Latgolys Kulturys centra izdevnīceiba izdavuse Valentinys Kašys gruomotu “Briežuciems”, kas ir veļtejums Brīžucīmam i tuo cylvākim, informej izdevnīceibys sātys lopa.

Gruomotā apkūpuots pyrmais pietejums par Brīžucīma pogostu laikā nu 1941. da 2014. goda. Tamā atspīgeļuots pogosta administrativais īdalejums, pyrmūs kolhozu, kai ari p/s “Briežuciems” izveide i pastuoviešona.

Analizāta 1941. i 1949. goda deportaceja, apsavārti izsyuteitūs brīžucīmīšu liktini. Publicātys ar ituom nūtikšonom saisteitūs cylvāku atminis.

Lela nūdaļa veļteita školu viesturei: Brīžucīma pamatškola (fakti i materiali nu 1910. goda), Apsaiņu pamatškola, Aussolys pamatškola i Augstasyla pamatškola. Dūts īskots Brīžucīma pogosta bibliotekys, feldšerpunkta i kluba viesturē.

Kotrai nūzarei dalykta informaceja i par Brīžucīma pamatškolys absolventim, i cytim cylvākim (saisteitim ar Brīžucīmu), kurī davuši zynomu īguļdejumu vaļsts i nūvoda atteisteibā. Paruodeita ari Brīžucīma pogosta kasdīna šudiņ: zemnīku saimisteibu, NVO “Saulessvece” darbeiba.

Nūslāgumā ir cylvāku dzeivisstuosti par pīradzātū i puordzeivuotū dažaidūs padūmu laika periodūs.

Gruomotys informativū materialu papyldynoj fotografejis.

Gruomota izdūta ar Latgolys regiona atteisteibys agenturys, Vaļsts Kulturkapitala fonda, Bolvu nūvoda dūmis i profesora Vitāleja Zeļča i Juoņa Trupovnieka atbolstu.