Kuorsovys nūvoda dobys parkā “Numernes valnis” 10. septembrī, ar dīnys i nakts sieņuošonys festivalu “Ejom bakuot!”, tiks atzeimuoti nu jau 5 godi, kai bīdreiba “Kārsavas novada jauniešu centrs “Pūga”” aizsuoce sieņuošonys tradiceju naktī, informej nūvoda turisma organizatore Inga Bernāne.

Itymā godā sadarbeibā ar Dobys aizsardzeibys puorvaļdi sieņuošonys festivals tiks papyldynuots ar dīnys daļu, kuruos suokys planavuotys nu 16.00 (puļciešonuos vīta). Latvejis Dobys muzeja mikologe Inita Dāniele pasuokuma apmaklātuojim paleidzēs īpazeit Latvejā augūšuos sieņs i tūs īpašeibys. Eipaši aicynuotys saimis ar bārnim, kas varēs dūtīs sieņuot dīnys gaišajā daļā i, īspiejams, pat atrast kaidu ratumu dobys parka “Numernes valnis” teritorejā. Jaunuokajim dalinīkim tiks pīduovuotys izzynūši – rodūšys aktivitatis, sovukuort pīaugušī varēs puorbaudeit sovys zynuošonys, izspielejūt spēli “Atpazīsti sēnes”.

Sovukuort sieņuošonys festivala “Ejom bakuot!” nakts dalis suokums ir planavuots nu 20.30 (puļciešonuos vīta). Itymā godā festivalam ir eipaša retro pīskaņa – pyrmūs dalinīkus, kas dasasaceis, iz pasuokuma nūtikšonys vītu vess retro auto kluba puorstuovi ar sovim unikalajim spākrotim. Nu 19.00 da 20.00 retro auto varēs apsavērt pi Kuorsovys kulturys noma i tod kūpeigā kolonā dūtīs iz sieņuošonys festivalu.

Pasuokuma organizatori aicynoj izavielēt laika apstuoklim atbylstūšys drēbis retro stilā, apsabruņuot ar luktureiti lobuokai radzameibai, skalini atbylstūši sovai sieņuošonys pakuopei, nazeiti i 3 cylvāku sastuovā dūtīs sajimt “sieņu baisūņa” titulu. Nūslāgumā vysi dalinīki tiks cīnuoti ar gordu zupu i eipašu atrodumu saiminīki tiks ari pi bolvu.

Nakts sieņuošonys festivals pīcu godu laikā nu vīteja mārūga aktivitatis jaunīšim ir izaudzs da storptautyska pasuokuma, kas itymā godā sūlejās puļcēt dalinīkus na tik nu Latvejis, bet ari nu Armenejis, Ukrainys, Pūlejis, Moldovys i Bulgarejis.

Komandys nakts sieņuošonys festivalam var īprīkš dasasaceit, zvonūt 28343926 voi rokstūt iz e-postu: biedriba.puga@gmail.com.