Decembra suokuos tiks eipaši gūdynuota Zīmeļlatgolys tradicionaluo dzīduošona

Decembra suokuos tiks eipaši gūdynuota Zīmeļlatgolys tradicionaluo dzīduošona

3. decembrī 18.00 Viļakys nūvoda Škilbanu pogosta Rekovā nūtiks vairuokom tradicionalajā kulturā nūzeimeigom nūtikšonom boguots pasuokums – Zīmeļlatgolys tradicionaluos dzīduošonys gūdynuošonys svātki “Dzīdat, meitas, kū gaidat!”, kurūs tiks izzynuota Zīmeļlatgolys tradicionaluo dzīduošona, prezentāts jauns izdavums “Škilbanu sīvas”, svieteits Škilbanu etnografiskuo ansambļa 35 godu jubilejs i ari pyrmū reizi publiski atruodeits eipaši etnografiskajam ansambļam veiduots videoklips, informej izdavuma veiduotuoja Edeite Husare.

Decembra suokys Latvejis tradicionaluos kulturys nūtikšonuos eipašs nūteikti byus ar izdavuma “Škilbanu sīvas” izīšonu. 144 puslopu bīzuo gruomateņa i kluotyn dalyktais audio disks ar dzīšmu īrokstim byus unikala līceiba par Škilbanu etnografiskū ansambli i tuo dzīduotuojom, kai ari ar Zīmeļlatgolā, eipaši Škilbanūs dzīduotūs dzīšmu repertuaru. Tik leli izdavumi, kas veļteiti kaidys nūteiktys vītys tradicionalajai dzīduošonai i eipaši konkretam kolektivam, Latvejā da šam ir ratums. 2008. godā izguoja etnomuzikologis Andys Beitānis sastuodeituo gruomota “Medņevas dziedātājas”, niu tai dasavīnuos ari “Škilbanu sīvas”. Izdavumā apkūpuota informaceja par Škilbanu etnografiskuo ansambļa viesturi 35 godu garumā, 20 dzīduotuoju dzeivisstuosti, 26 vysaidūs laikūs īraksteitu škilbanīšu dzīšmu audio īroksti, nūšu transkripcejis i dzīšmu vuordi. Izdavuma veiduotuoja, Škilbanu pogostā augušuo Edeite Husare, saka: “Izdavums ir kai pīmineklis tom lauku sīvom, kas paraleli sovom kasdīnas lauku dareišonom, atrūn laika sasatikt, dzīduot i napagaisynuot sovas, škilbanskuos dzīsmes, tys ir pīmineklis sīvu dzeivem, kladēs pīraksteitom dzīsmem i dažaidajim bolsim. I gols golā – Škilbanu sīvas, jūs dzīsmes i byušona ir vusa muna apzynuotuo bierneiba i jauneiba i itei ir piļneigi atkluota atsazeišona jom mīlesteibā!”

Zīmeļlatgolys tradicionaluos dzīduošonys gūdynuošonys svātkūs kulturys centrā “Rekova” ar dzīsmem sasatiks na viņ Škilbanu etnografiskais ansamblis, nu ari Viļakys nūvoda Medņovys etnografiskais ansamblis, Upeitis etnografiskais ansamblis, folklorys kūpys “Upīte”, “Rekavas dzintars”, taipat gostūs byus folklorys kūpa “Ceidari”, kurei Škilbanu dzīsmis dzīd ari Reigā. Zīmeļlatgolys tradicionaluos dzīduošonys eipašū stuostu atkluos etnomuzikologe Anda Beitāne, nu sovu verseju par škilbanīšu dzīduotuom dzīsmem atruodeis ari J. Vītuola Latvejis Muzykys akademejis tūpūšī i asūšī etnomuzikologi. Iz 3. decembra svātkim aicynuots sevkurs interesents, īīšona pasuokumā ir bez moksys.

01-skilbenu-etnografiskais-ansamblis-28072016-foto-edite-husare

Škilbanu etnografiskais ansamblis dybynuots 1981. godā, kod Škilbanu sīvys, īsadvasmojūt nu sābru cīma Upeitis dzīduotuojom, saguoja kūpā, kab ar dzīsmem kuplynuotu vysaidys kasdīnys i svātku nūtikšonys. Ansambļa sastuovā kluotyn pyrmajom ansambļa dzīduotuojom itūšaļt tradiceju turpynoj ari jaunuos dzīduotuojis. Spylgtuokuo dzīšmu zynuotuoja, kuruos teiktuos dzīsmis vys vēļ veidoj leluokū daļu ansambļa repertuara, beja nu jau myužeibā aizguojušuo Rozaleja Slišāne. 2016. goda vosorā ansambļa dzīduotuojis tyka īmyužynuotys videoklipā, kuruo pyrmizruode nūtiks 3. decembrī.

Anda Beitāne, stuostūt par Zīmeļlatgolu i tuos tradicejom, soka: “Latvejis zīmeļaustrumu mola sūpluok Krīvejis rūbežai, nazkodejuo Abrenis apriņča teritoreja, bejušuo Bolvu rajona daļa aba, atteiceigi myusu dīnu administrativi teritorialajam īdalejumam, Bolvu nūvoda Brīžucīma pogosts, Baļtinovys nūvods i Viļakys nūvoda Škilbanu i Medņovys pogosti, kai ari Viļakys piļsāta – tei ir vīta, kur vēļ i myusu dīnuos īspiejams satikt napastorpynuotā veidā puormontuotu tradicionaluos muzykys repertuaru, kas turpynoj dzeivuot, vys vēļ pīsamārojūt jaunim apstuoklim.” Nivīna cyta Latvejis puse uorpus Reigys vys vēļ navar līleitīs ar tik daudzskaitleigu ar tradicionalū muzyku saisteitu kolektivu skaitu, kai tys ir Viļakys nūvodā.

Zīmeļlatgolys tradicionaluos dzīduošonys gūdynuošonys svātkus reikoj bīdreiba “Latgolys Producentu Grupa”, sasadorbojūt ar kulturys centru “Rekova”. Svātku nūtikšonu atbolsta Vaļsts kulturkapitala fonda Latgolys kulturys programa ar AS “Latvijas Valsts meži” atbolstu, nu izdavums “Škilbanu sīvas” teik radeits ar Vaļsts kulturkapitala fonda i Viļakys nūvoda dūmis atbolstu. Zīmeļlatgolys tradicionaluos dzīduošonys gūdynuošonys svātki byus suokums ari ceļam, kab saryupātu Škilbanu etnografiskajam ansambļam jaunus tautystārpus LEADER projektā “Tautas tērpu iegāde Šķilbēnu etnogrāfiskajam ansamblim” (Nr. 16-07-AL19-A019.2207-000005).

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]