17. marta vokorā Daugovpiļs teatrī izskanēs multimuokslinīka Artūra Uškāna rodūšuo dorba vokors – koncerts “… Ai pagali pa pakali…”, informej koncerta producente Aija Eriņa.

Artūrs Uškāns ir zynoms kai grupys “Laimas Muzykanti” liders, dzejnīks, daudzu popularu dzīšmu i tautys dzīšmu aranžiejumu autors. Piec div izpuordūtu jubileja koncertu Latgolys viestnīceibā GORS, piec daudzu klauseituoju lyugumu, rodūšuo dorba vokors – koncerts nu nūtiks Daugovpiļs teatrī. “Itū koncertu grybu veļteit Daugovpilei – vītai, kurā pyrma puorsacieļu iz golvyspiļsātu, asu dzeivuojs i dorbuojīs 23 godus,” soka muokslinīks. Nu akademiskuos muzykys da hardroka, nu tautysdzīšmu apdaru da teatra muzykys i autordzīsmem – tik plots muzykys spektrys gaida kotru, kurs atīs iz Daugovpiļs teatri 17. marta vokorā.

Vierīneigajā koncertizvadumā varēs dzierdēt tautā īmīļuotys i jaunys dzīsmis, kuruos izpiļdeis pats autors, Īva Akuratere, Olga Rajecka, Aija Eriņa, bruoli Punculi, veiru kūpa “Vilki”, grupys “Patrioti.lg” i “Stage On”, etnografiskais ansamblis “Vabalis”, etnodzīduotuoja Leila Alijeva, fraņču muokslinīks Žiljēns Dišarī (Julian Dicharri) i daudzi cyti populari muokslinīki. Koncertu muzykali boguotynuos Austrumlatgolys steigu kvartets i Daugovpiļs Muzykys vydsškolys kors (dirigents J. Ustinskovs). Vysim skaņdorbim dzeivūs pavadejumus spielēs “Laimas Muzykanti” i izcyluo pianiste Sintija Šteinkopfa.

“Asu puorsteigts i pasasoku sovim klauseituojim par lelū interesi – nabeju gaidejs! Kūpā ar sovim lobajim draugim, koncerta dalinīkim, doram vysu, kab dzeivis pūsmys, kū pavadeisit itymā pasuokumā, byutu pīsuotynuots ar lobom emocejom i pozitivu energeju. Eipaši asu pateiceigs “Laimas Muzykantim”i pianistei Sintijai Šteinkopfai, kurī nu sirds ryupejūtīs par koncerta kūpejū skaniejumu, pat vysvāluokuos vokora i pat nakts stuņdis pavoda kūpeigūs mieginuojumūs,” aizkustynuots soka Artūrs.

Pasuokumu reikoj bīdreiba “Latgalīšu Etnokulturys centrs”.

Beletu cenys nu 8 da 15 eiro, tī nūpierkami “Biļešu Paradīzes” kasēs i internetā.