Sastdiņ, 3. junī, paliks opols gods, kai Daugovpilī durovys attaiseja Latvejā leluokais Šmakovkys muzejs, partū itai nūtikšonai par gūdu, itamā dīnā īīšonys moksa muzejā byus tik 1.75 eiro. Sovukuort svātdiņ, 4. junī, vysi tiks laipni gaideiti muzejā uz jubileja turpynuojumu, informej Daugovpiļs piļsātys pošvaļdeibys turisma atteisteibys i informacejis agenturys vacuokuo eksperte turisma jūmā Lolita Kozlovska.

12.10, 13.30, 14.30 i 15.40 apmaklātuojus izklaidēs postfolklorys grupa “Rikši”. 13.00 sevkurs interesents varēs pīsadaleit šmakovkys taiseišonys meistarklasē i dzierdēt meistara stuostus. Sovukuort 14.00 nūtiks šmakovkys saldiejuma meistarklase, kū reikuos zynuotkuoreibys centrys “Zinoo Daugavpils”. 15.00 nūtiks ekskurseja “Īpazeisti muzeja ekspozicejis duorgumus!”, kuruos laikā varēs izzynuot par naparostim eksponatim, kas izvītuoti muzeja stendūs. Nu 12.00 da 16.00 muzejā dorbuosīs Latgalīšu čarauneicys zeiliešonys salons, kurymā tei sevkuram izzeilēs nuokūtni. Par pasuokuma muzykalū nūformiejumu pasaryupēs ari kūklātuoja Ilona Stepiņa. Itamā dīnā muzejā byus itaida īīšonys moksa: pīaugušajim – 3.50 eiro/pers., školānim (18+), studentim, seniorim, cylvākim ar eipašom vajadzeibom – 2.50 eiro/pers., saimis belets (3 – 8 pers.) – 2.50 eiro/pers., grupai (9 – 40 pers.): pīaugušajim – 3.15 eiro/pers., školānim (18+), studentim, seniorim, cylvākim ar eipašom vajadzeibom – 2.15 eiro/pers. Grupu ekskursejis juodasoka īprīkš:+371 654 65422818,+371 26444810, info@smakovka.lv

Nu attaiseišonys 2016. godā Šmakovkys muzeju apmekliejuši vaira kai 7600 interesentu. Muzeja digitalajuos ekspozicejuos ar jaunuokūs tehnologeju paleidzeibu interaktivai ir vareiba izzynuot šmakovkys taiseišonys procesu, kai ari apsavērt autentiskys i īspaideigys ražuošonys īkuortys. Kluotyn stuostam par dzierīņa taiseišonu, te ir vyspuseiga informaceja par Latgolys viesturi, kas paleidz izprast regiona viesturis nūzeimeiguokūs pūsmus. Muzeja ekspozicejom ir ari izgleitojūša lūma, partū ka tuos snādz informaceju par alkohola lītuošonys sakom. Muzejā i individualajim apmaklātuojim, i grupom teik pīduovuoti gida pakolpuojumi. Bez moksys ir audiogidi latgaliski, latviski, kai ari krīvu, angļu, vuocu i lītaunīku volūdā.