Izguojuse jauna lugu gruomota latgaliski – aizkaļnītis Rasmys Zariņys “Ostoņas lizeikas mada dvēseles prīcai”.

Gruomotā īkļauti ostoni dažaida apjūma dramaturgiski dorbi, kas atspīgeļoj Latgolys ļaužu kasdīnys ainys. Lugu darbeibys laiks aptver lelu amplitudu, varūni dažaidys situacejis izdzeivoj gon 19. godu symta 80. godūs, 20. godu symta 30. godūs, padūmu i kolhoza laikūs i ari myusu dīnuos.

Rasmys Zariņys dorba dzeive ir saisteita ar Raiņa muzeju “Juosmuiža”, jau 20 godus jei voda Aizkaļnis amatīrteatra kūpu “Gaisma”, byudama i lugu autore, i režisore. Autore par sovom lugom soka: “Kotrā ir nalela humora deva. Vairuokuos luguos pīmynāts Odums. Tai sauce munu vacvactāvu, kurs sovā jauneibā ir ticīs ar Raini, tūlaik Juoni Plīkšānu. Izmontojūt vacvactāva nūstuostus, kai Rains guoja pi jim tolkuos, pļuove i mārovās spākim ar Odumu, roduos luga “Munu jaunu dīnu zeme”.”

Izdūtuo gruomota byus nūdereiga amatīrteatrim, kurī gryb īstudēt lugys latgaliski.