Pīsadoli vyspasauļa diktatā latgaliski!

Pīsadoli vyspasauļa diktatā latgaliski!

Sastdiņ, 7. oktobrī, kod nūtiks III pasauļa diktats latvīšu volūdā, Latvejis Radejis Latgolys studejis veiduotais raidejums “Kolnasāta” pīduovoj sevkuram puorbaudeit latgalīšu rokstu volūdys zynuošonys. Diktats latgalīšu volūdā skanēs sastdiņ, 7. oktobrī, 18.15 Latvejis Radejis 1 latgaliskajā raidejumā “Kolnasāta”.

Diktatu Latvejis Radejā 1 skaiteis jaunatnis lītu specialiste Leila Rasima, i tys byus fragments nu latgalīšu literatis Ilzis Spergys gruomotys “Dzeiveiba”. Pīraksteitū tekstu piečuok kotrys pats varēs puorbaudeit Latgalīšu kulturys ziņu portalā lakuga.lv. Diktata teksts sastuodeits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus.

Īsadvasmojūt nu pasauļa diktata latvīšu volūdā, ideja par diktatu latgalīšu rokstu volūdā rodusēs raidejuma “Kolnasāta” producentei Vinetai Vilcānei. “Itūšaļt daudz teik dareits latgalīšu volūdys saglobuošonā i atteisteišonā. Latgalīšu volūda ir daļa nu latvīšu volūdys, kas ir na mozuok vierteiguoka i skaneiguoka par latvīšu literarū volūdu. Volūda ir dzeiva na tik runā, nu ari rokstūs. Nasaverūt iz tū, ka vareibys īsavuiceit latgalīšu rokstu volūdu ir īrūbežuotys i daudzi tū nav vuicejušīs školā voi ari ir īsavuicejuši pošvuiceibys ceļā, cylvāki nasakautrej tamā raksteit, eipaši jaunuokuo paaudze. Tys ir tik laika vaicuojums, kod pareizi latgaliski rokstūšūs cylvāku skaits pīaugs. Iz tū tīcūtīs i dūmūt stimulu zynuošonu uzlobuošonai, aicynojam puorbaudeit asūšuos latgalīšu rokstu volūdys zynuošonys, pīrokstūt diktatu latgaliski. Diktats latgaliski radejis ēterā skanēs pyrmū reizi,” stuosta Vilcāne.

 

Diktatu nūsaklauseit i puorbaudeit var ite.

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]