Latgolys Regionaluo televizeja (LRT) ar Vaļsts regionaluos atteisteibys agenturys finansialu atbolstu, realizejūt mierkprogramys “Regionalūs i vītejūs medeju atbolsta programa” projektu “Mums Latvejā juobyut vīnuotim, bet na vīnaidim”, gatavej 10 raidejumu cyklu “Vīnuoti, tok na vīnaidi!”, informej raidejuma veiduotuoja Evika Muizniece. Pyrmais raidejums jau šudiņ, 10. oktobrī.

2017. gods paīt Latgolys kongresa symtgadis zeimē. Lai ari 4. pasauļa latgalīšu saīts ir nūtics ituo goda majā, dorba pījimtuos rezolucejis eistynuošonai ir vēļ daudz. Ari vaicuojumu, kas patīši ir steidzams, kas pakuortuots sūļs ekonomiskūs, izgleiteibys i volūdys politikys, kulturys i medeju telpys sakuortuošonys problemu rysynuojumā, ir gona.

LRT pīduovoj 10 raidejumu cyklu “Vīnuoti, tok na vīnaidi!”, kur kūpā ar Latgolys pošvaļdeibu puorstuovim, nūzaru ekspertim, Saīta rezolucejis izpiļdis komitejis i atbiļdeigūs ministreju puorstuovim sprīss par prioritarajim vaicuojumim Latgolys regiona atteisteibā, par atbiļdeibom i atbiļdeigajim, lai īcarātī mozuokī i leluokī mierki suoktu eistynuotīs.

Pyrmajā raidejumā tiks atsavārts iz Latgolys kongresu 1917. godā i 4. pasauļa latgalīšu saītu 2017. godā, saprosts, kai obeji pasuokumi ir saisteiti i kas pamudynuojs Latgalīšu kulturys bīdreibu reikuot saītus, kuru sastuovdaļa ir ari akademiskys konfereņcis, kongresi jau nu 1992. goda.

Svareigi, ka raidejumūs tiks diskutāts par vysim obejūs kongresūs apsprīstajim i rezolucejā īraksteitajim vaicuojumim. Skateituoji aicynuoti atbiļdēt iz raidejumā izskaniejušū vaicuojumu, īgiut bolvys, aktivi komeņtēt voi īsnīgt elektroniski sovus vaicuojumus iz e-posta adresi lrt.zinas@inbox.lv voi ari vītnē Facebook.

Raidejumu translēs kotru ūtrū ūtardīni (suocūt ar 10.10.2017.) kanalā Re:TV LRT lūgā 21.00; gotovī raidejumi tiks publicāti ari kanala LRT sātys lopā i youtube kontā.