9. februarī 18.30 stuņdēs pādejū reizi iz Daugovpiļs teatra skotuvis spēlēs ospruoteibu i nagaideitu paviersīņu pīpiļdeitū komedeju latgaliski “Latgaliešu rulete”.

Līpeņu saimei liktiņs pīspieliejs laimeigū loterejis beletu. Kai jau kuorteigim cylvākim pīsanuok, teik uzaicynuoti tyvuokī draugi i itei nūtikšona teik nūsvieteita. Bet nuokušajā reitā Līpeni atkluoj, ka loterejis belets ir izgaiss! Golvonī varūni naspiej rast sev vītu, raugūt saprast, kur tei ir palykuse. Vaineigais var byut sevkurs: i prīkšnīks, i kaids nu draugu, varbyut nalabvieleigs horoskops? Voi pat NLO! Patīseibys mekliejumūs Līpeni ir gotovi likt lītā vysus īspiejamūs īrūčus, kas vaiņugojās ar puorprotumim boguotu nūtikšonu vērtini.

Īstudiejums “Latgaliešu rulete” veiduots piec V. Sigareva lugys “Krievu loto” motivu, kurs, koč i nav vīns nu rakstureiguokajim dramaturga dorbim, nu tymā nūteikti jiutama Sigareva dorbim īrostuo, aiz satirys i komiskuo pleivura nūglobuotuo dzeivis patīseiba. Sovūs dorbūs V. Sigarevs pīsavierš parostu cylvāku dzeivei, kas ir vīns nu īmaslu, parkū juo dorbi spiej uzrunuot tik lelu sabīdreibys lūku.

Izruode “Latgaliešu rulete” tykuse nomināta Latgalīšu kulturys goda bolvai “Boņuks” kategorejā “Goda snīgums skotuvis muokslā”, kai ari īmyužynuota LTV 1 raidejumā „Teātris.zip”.