Atsaverūt iz “Vuolyudzānim” i latgalīšu volūdys i kulturviesturis olimpiadi

Atsaverūt iz “Vuolyudzānim” i latgalīšu volūdys i kulturviesturis olimpiadi

Rēzeknē 21. aprelī jau 18. reizi nūtyka skotuvis runys konkurss “Vuolyudzāni” i vaļsts atkluotuo latgalīšu rokstu volūdys i kulturviesturis olimpiade. Dažaidu vacumu bārni i jaunīši puorbaudeja sovys zynuošonys latgaliskajā kultūrā, latgalīšu rokstu volūdā i prasmē deklamēt latgalīšu literaturu.

Tradicionali vysus godus itī latgalīšu volūdys svātki nūteik Rēzeknis 1. vydškolys, tān – Rēzeknis Vaļsts 1. gimnazejis telpuos. Konkursa daleibnīkus sveica Rēzeknis Vaļsts 1. gimnazejis direktors Juoņs Poplavskis, Rēzeknis nūvoda izgleiteibys puorvaļdis vadeituojs Guntars Skudra i Latgalīšu kulturys bīdreibys vaļdis prīšksādātuoja Līveja Plavinska.

Itūgod konkurss īsasuoca ar emocionalu šaļti – vysi kluotasūšī ar klusuma šaļti pīminieja dzejneicu Paulīni Zalāni-Vallenu, kura taišni 21. aprelī tyka guļdeita Stiernīnis Syla kopsātā.

Konkursā pīsadalieja 63 “vuolyudzāni” nu 23 izgleiteibys īstuodem. Konkursa daleibnīkim vajadzēja izavielēt latgalīšu dzejnīku – jubilaru Ontona Slišāna, Madsolys Juoņa i Neikšanīša dorbus voi cytu autoru dzejis i prozys dorbus par kaidu nu temu: dzymtuo volūda, muns nūvods, Tāvu zeme. Konkursu viertēja režisore Māra Zaļaiskalns, dzejneica Anna Rancāne, muzikis i Rēzeknis nūvoda dūmis deputats Guntis Rasims, muziki Jurs Vucāns, Arņs Slobožanins, Andris Slišāns, portala lakuga.lv redaktore Vineta Vilcāne, žurnalisti Renāte Lazdiņa i Tenis Bikovskis, Harijs Bernāns.

Interesanti ir tys, ka daudzi daleibnīki konkursā pīsadola gondreiž kotru godu, izaugdami nu 1. klasis da vydškolys, bet vīns nu pyrmūs godu “vuolyudzānim”, Guntis Rasims, tān ir žūrejis lūceklis. Ari daleibnīku sagatavuoteibys leimiņs pa itim godim ir pasaugstynuojs, par kū lels nūpalns ir školuotuojim.

18. atkluotajā vaļsts olimpiadē latgalīšu rokstu volūdā i kulturviesturē pīsadalieja ostonis izgleiteibys īstuodis: Rēzeknis tehnikums, Rēzeknis Vaļsts 1.gimnazeja, Kruoslovys Vaļsts gimnazeja, Drycānu vydškola, Tiļžys vydškola, Nautrānu vydškola (2 komandys) i Baļtinovys vydškola. Olimpiade nūtyka pīcuos kuortuos. 1. kuortā olimpiadis daleibnīki atkluoja sovys latgalīšu rokstu volūdys prasmis, 2. kuortā jim vajadzēja atbiļdēt iz vaicuojumim par Stefanejis Uļanovskys dorbu “Poļu Inflantijas latvieši”. Lai varātu atbiļdēt iz 3. kuortys vaicuojumim, vydsškolānim, sasagatavejūt olimpiadei, vajadzēja puorsavērt 2017. goda TV raidejumus: “Atklāj Latgali ar Kristapu Rasimu” , “Cytaidi latviskais”, “Sajūti Latgali (2.sezona)”, “Trešā zvaigzne. Sākotne. Personība.”, “Vīnuoti, tok na vīnaidi”. 4. kuortys vaicuojumi beja veļteiti dzejnīkam Ontonam Slišānam, bet 5. kuortā – tradicionalais Latgolys kulturtests par 2017. goda nūtikšonom kulturā.
Olimpiadis aizdavumus sagataveja i viertēja profesoris Ilga Šuplinska i Lideja Leikuma i rakstneica Sandra Ūdre.

Kuplais daleibnīku skaits aplīcynoj, ka bārnim i jaunīšim ir interese par latgaliskū kulturu i latgalīšu volūdu. Svareigi ir jamūs itū interesi saglobuot ari piec konkursu, dūdūt jaunus stimulus vaira vuiceitīs rokstu volūdu, i pošim leidzdorbuotīs kulturys saglobuošonā i populariziešonā.

Olimpiadi i skotuvis runys konkursu atbaļstēja Rēzeknis nūvoda pošvaļdeiba, Rēzeknis Vaļsts 1. gimnazeja, Rēzeknis Tehnologeju akademeja, Latgalīšu kulturys bīdreiba, Latvīšu volūdys agentura, žurnals “A12”.

Olimpiadis rezultati.

Vuolyudzānu rezultati.

Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]