Pārn Latgolys kongresa symtgadei par gūdu Daugovpiļs teatrī tyka īstudāta muzykala izruode „Nūgrymušõ pile” Olega Šapošnikova režejā, kuru itymā nedelis nūgalē, 5. majā, 16.00 stuņdēs varēs nūsavērt ari televizejis ekranūs – LTV 1 raidejumu cyklā “Teātris.zip”. Raidejumā gostūs byus izruodis dzīšmu tekstu autore i aktrise Kristīne Veinšteina kūpā ar Bolvas lūmys atveiduotuoju Ritvaru Gailumu.

“Nūgrymušõ pile” ir Daugovpiļs teatra duovona Latvejis symtgadē. Rodūšuo komanda davuse izruodei apakšnūsaukumu “Lūgšana par Latviju”, cereibā, ka izruode vīnuos vysu skateituoju sirds mīlesteibā pret sovu dzymtū zemi.

Lugys autors ir Fraņcs Trasuns, kurs beja vīns nu Latvejis apsavīnuošonys idejis iniciatorim, ir ituos lugys autors. Jis vysod ir pastreipuojs, ka nikod nav gribējs byut par rakstnīku, nu itū dorbu ir darejs kai pīnuokumu, kab kolpuotu latgalīšu literaturai. Godim ilgi par itū lugu beja damiersts, i niu, gondreiž piec symtu godu, tauta otkon tiks uzrunuota Fraņča Trasuna vuordim. Skateituoji teik aicynuoti aizadūmuot par tū, kaidi beja latvīšu tautys sapyni tūreiz i voi kas ir pasamainejs itūs godu laikā.

Izruode viestej par kaidu pili, kurymā vysi nazkod dzeivuoja laimē i puorticeibā. Ar laiku piļs dzeivuotuoji tai daroduši pi boguoteibys, ka puorstuojuši cīneit dīniškū maizi, dorbu i godu gaitā izveiduotuos tradicejis, partū tei nūgryma. Nu tei augšamceļsīs, ka atsarass cylvāks, kurs gareiguos vierteibys gūduos augšuok par materialuom i byus gotovs vest sovus tautīšus ceiņā par itū pagaisynuotū laimeigū zemi. Rodūšuo komanda tyc, ka Trasuns par laimeigū zemi ir skaitejs Latveju.

Publicitatis karteite.

Drukavuot