Latvejis Posts sadarbeibā ar Latvejis Dobys fondu izdūd jaunu tematiskū postmarku par Latgolu – „Smalkā najāda”. Smolkuo najāda aba ‘Najas tenuissima’ ir unikals iudiņa augs, kas pasaulī ir atrūnams viņ 50 vītuos. Treis atradnis atsarūn Latgolys teritorejā – Sauliskolna i Kruoslovys azarūs, vysvaira taišni Sivera azarā. Smolkuo najāda ir aizsorgojama vysā Eiropys Savīneibys teritorejā.

Smolkuos najādys postmarkys nominals ir 0.85 eiro i tei paradzāta syuteišonai pa vysu pasauli. Teik skaiteits, ka postmarka veicynuos Latgolys nūvoda atpazeistameibu Eiropā, rodūt interesi par Latgolys dobu i eipaši – par azarim, sekmejūt turisma atteisteibu. Postmarku, tuos bloku i pyrmuos dīnys aplūksni ir zeimuojs muokslinīks Edgars Folks. Postmarkys blokā attāluoti ari cyti augi: Dortmaņa lobeleja, mīturu hidrila i lašveideigūs kuortys zivs – rapss aba saļava.

Itūšaļt paradzātais markys metīņs ir 30000 eksemplaru, pyrmuos dīnys aplūksnis metīņs – 1000 eksemplari. Aplūksnis cena – 0,60 eiro.  Pasyuteit smolkuos najādys marku i pyrmuos dīnys aplūksni var leidz 15.juļam, rokstūt e-postu iz infofil@pasts.lv ar nūruodi „Smalkās najādas markas un pirmās dienas aploksnes pasūtījums”.

10. augustā plkst. 14.00 nūtiks smolkuos najādys postmarkys pyrmuos dīnys aplūksnis zeimūguošonys pasuokums Kruoslovys Viesturis i muokslys muzejā. Pasuokuma laikā tiks atkluota Latvejis Dobys fonda ceļojūšuo fotoizstuode „Sauleskalna ezerzemes daba un ainavas”. Tei byus apsaverama leidz pat ituo goda 30.novembram dažaiduos Latgolys vītuos: Skaistā, Dagdā, Aulejā, Kombuļūs, Aglyunā, Ludzā i Preiļūs. Izstuodē tiks eksponātys 20.g.s. 20.–60.godu i myusu dīnu fotografejis, 1943.–2005.goda postkarteitis i atkluotneitis, kai ari snāgta informaceja par Sauliskolna azarzemis dobys vierteibom i tūs apsaimnīkuošonu videi draudzeigā veidā.

Viests sagataveita piec visitlatgale.lv.

Karteitei ir ilustrativa nūzeime.