Rokstu sagataveja: portals lakuga.lv

1. Sajust laimi Laimis muzejā

Kruoslovys nūvoda Indrā, pošā Boltkrīvejis pīrūbežā, atsarūn vīneigais Laimis muzejs Latvejā. Tys niu pat suocs sovu dorbu. Tī variesi izspēlēt laimis flīgeli, izzynuot laimis formulu, pasavērt iz pasauli rozā brillem i dareit daudz kū cytu.

2. Izaļustēt latgalīšu Pozitivusā aba festivalā “Muzykys Skrytuļs”

Daugovpiļs nūvoda Leiksnā 14.–15. julī jau septeitū reizi nūtiks latgalīšu muzykys festivals “Muzykys Skrytuļs”, kurā sasalaseis muziki, kas dažaidūs žanrūs izpylda dzīsmis latgaliski. Uzastuos Jānis Aišpurs nu “The Sound Poets”, Kārlis Kazāks, grupys “Latgalīšu reps”, “Bez PVN”, “Dabasu Durovys”, Sovvaļnīks, “Fenikss”, “Metrs”, “Ausmeņa Records” i daudzi cyti.

3. Nūsamauduot Latgolys jiurā

Par Latgolys jiuru sauc Rāznys azaru, tuo pludmalis vylynuot vylynoj atpyutnīkus i mauduotīs grybātuojus. Tu vari byut ari par Latgolys jiurys braucieju, izbraucūt ar Buru Guru jahtu. Storp cytu, pyrms vairuoku godu Rāznys azara apleicīnē Lauris Reiniks filmēja videoklipu dzīsmei “Stāsti man” i tymā skaņ latgalīšu volūda.

4. Uzkuopt augstuokajā skotu tūrnī Latvejā

Latvejis augstuokais skotu tūrņs atsarūn Latgolā, tys pastateits Lelajā Līpu kolnā i ir 34 m augsts. Nu tuo pasaver breineigs skots iz tivejū apleicīni, Rāznys i cytim azarim.

5. Sajust ticeibys spāku Aglyunā

Augusts katuolim ir eipašs laiks, kod tyukstūšys ticeigūs puļcejās Aglyunā, kab gūdynuotu Jaunovu Mareju. 14. augusta naktī ļauds puļcejās iz Tautys Krystaceļu, kurā var sajust ticeibys spāku, ari itys gods nabyus izjāmums.

6. Pabyut Raiņa jaunu dīnu zemē

Kurs gon nazyna Raini, bet voi zynuoji, ka Raiņs sovu jauneibu pavadeja Latgolā? Meklejūt Raiņa pādus Latgolā, vari pabyut Raiņa sātā Berkenelē Daugovpiļs nūvodā i Raiņa muzejā “Jasmuiža” Preiļu nūvodā. Storp cytu, Raiņa dzeju var skaiteit ari latgaliski. Meklej ite.

7. Paraudzeit Rēzeknis “Ausmeņa Kebabs” iedīņkarti

Reigā cīši daudz latgalīšu i lobu cylvāku var satikt “Ausmeņa Kebabā”. Atbrauc iz Rēzekni i paraugi, kai kebabs garšoj ite – piļsātā Latgolys sirdī!