iPad planšetdatora zeimiejumi Rēzeknē

iPad planšetdatora zeimiejumi Rēzeknē

Rokstu sagataveja: Inese Dundure, žurnals „A12“

Kai vacais pasauļs sasateik ar jaunū – tys puorsteidzūši atsakluoj 95 godu siermuo muokslinīka dorbūs, kuri apkūpuoti izstuodē „Vacais pasauļs, Jaunais pasauļs“.

Gleznuotuojs i iPad zeimuotuojs Kazimirs Laurs dzims 1923. gada 7. novembrī Rēzeknis nūvoda Makašānu pogosta Škerbinīku cīmā. Rudiņūs muokslinīks bīži viņ ceļoj nu Kalifornejis (ASV) iz Latveju, lai īsaklauseitu dzymtuo nūvoda dobys skaņuos i satyktu sovus dūmubīdrus. Ūtruo pasauļa kara beiguos īsaukts latvīšu legionā, puorstaiguojs Vydzemi, pīsadalejs kaujuos pi Lubuona, Cesvainis, Moris, Nītauris, Kūrzemē pi Pienavys īvainuots, uorstētīs nūsyuteits iz Vuoceju. Karaveira gaitys atsuocs kai Tornys gruovracs i, Ūtrajam pasauļa karam beidzūtīs, tics Putlosys (Vuoceja) i Cēdelheimys (Beļgeja) giustekņu nūmetnēs. Vēļ byudams giustā, K. Laurs suoc zeimēt i gleznuot, vāluok, puorsacieļs iz Eslingenu (Vuoceja), kur vuiciejīs nūmetnis latvīšu muokslys školā pi muokslinīkim Ludolfa Liberta, Franča Bangis, Sigismunda Vidberga i Jūlija Matisona, itymā laikā pyrmū reizi ar sovim dorbim pīsadola ari vītejā izstuodē.

1950. godā K. Laurs izceļoj iz ASV i apsamat iz dzeivi Dīnvydkalifornejā, Klusuo okeana krostā Santamonikys piļsātā. Dzeivojūt Kalifornejā ar tik dažaidim klimatiskajim apstuoklim saulainajuos pludmalēs, tuksnešūs i kolnūs, jam nikod nav tryucs īdvasmojūšu ainovu, kab gleznuotu, i juo palete vysod ir bejuse dinamiska i optimistiska.

Vysu breivū laiku niule muokslinīks pavoda pi iPad planšetdatora, ar pylnu atdevi veļtejūt sevi zeimiešonai. Juo darbneica bīži viņ ir bejuse latvīšu muokslinīku i radūšūs darbinīku sasatikšonys vīta.

Lai ari aktivi gleznuot muokslinīks ir puorstuojs jau 2000. godu suokumā, tok jis vys ir turpynuojs radūšū darbeibu, pīmāram, zeimejūt ainovu i zīdu skicis ar kruosu zeimulim. 2017. goda nūgalē, 94 godu vacumā, K. Laurs atkluoja sev jaunu izteiksmis veidu – zeimēt iPad planšetdatorā. I jau ir sazeimiejs vairuok kai 50 dinamiskus attālus, kas niule ir daīmami izstuodē, daļa no jūs – kai tāluotuojmuokslys izdrukys.

Latgolys Kulturviesturis muzejs sadarbeibā ar Rēzeknis Muokslys i dizaina vydsškolu organizej jaunūs tehnologeju muokslys izstuodi „Vacais pasauļs, Jaunais pasauļs“. Izstuodis atkluošona Rēzeknis Muokslys i dizaina vydsškolys Boltajā izstuožu zalē 2018. goda 4. oktobrī 15.00. Izstuode byus apsaverama nu 4. oktobra da 3. novembra.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta līdzekļu projekta “Robežlīnijas” ītvarūs.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]