Pīci fakti par grupu “Gandreiž 10nīkā”

Pīci fakti par grupu “Gandreiž 10nīkā”

 

Roksta autors: lakuga.lv

Ituo goda rudinī sovu pīcu godu jubileju svietej alternativuo pankroka grupa nu Rēzeknis nūvoda Kaunatys pogosta – “Gandreiž 10nīkā” (G10). Grupa spieļoj sovys dzīsmis, paruodūt dažaidū dzeivi laukūs. Dzīsmēs natryukst humora, i grupa pamatā spieļoj sev par prīcu. Sveicūt grupu jubilejā, pīduovojam īsapazeit ar pīcim vaira ci mozuok zynomim faktim par “Gandreiž 10nīkā”.

“Gandreiž 10nīkā” sastuovā pošu reizi dorbojās: Juoņs Kuzminskis (gitara, bolss, vuordi, muzyka), Imants Zagorskis (bass), Vitālijs Grišunovs (bungys, bolss) i Aija Kuzminska (sintezators, šeikeri). Kai nūsmej poši grupys dalinīki, jī vysi ir taidi ekskluzivi – nivīns napazeist notu. Kasdīnā kotram nu jūs sovi dorbi i byušonys – Imants ir zemnīks i uzjiemiejs, Vitālijs vuicuos guņsdziesieju koledžā, Juoņs taisa gitarys, Aija ir lektore ar jurista izgleiteibu, bet poši smejuos, ka vysi kūpā dvēselēs vys tik ir muokslinīki. 

1. Izguojs pyrmais nu treju albumu

2017. goda augustā grupa izdeve sovu pyrmū albumu “Nasoki nikuo”. Tymā vydā ir devenis grupys dzīsmis. “Gandreiž 10nīkā” viesteja, ka tai kai nav variejuši saprast, kuruos nu grupys repertuara 40 dzīšmu izdūt albumā, partū ka tū byutu peļnejušys vysys, bet salikt vysys vīnā byutu par garlaiceigu, tod saguojs, ka “Nasoki nikuo” ir pyrmais nu izdūšonai paradzātūs treju albumu. Par albumu grupa nūpeļneja nominiešonu Latgalīšu kulturys goda bolvai “Boņuks 2017” kategorejā “Lobuokais snāgums alternativajā muzykā”. Bolvu gon sajēme apvīneiba “Latgalīšu Reps”. Albumā “Nasoki nikuo” īkļautuos dzīsmis: 1. Ehtī 2. Speizdeiguos acs 3. Ješka 4. Putreņa 5. Dzeraunis žigolo 6. Pierteņa 7. Putneni 8. Traktoru pavieļnīks 9. Bļaunu

2. Vīnys dzīsmis īdviesme Ontona Slišāna dzejā

Vysu grupys dzīšmu vuordu i muzykys autors ir grupys liders Juoņs Kuzminskis, bet dzīsmis “Ehtī” teksts raksteits, par pamotu jamūt Ontona Slišāna dzejūli “Veira bāda” speciali festivalam “Upītes Uobeļduorzs”. Dzīsmis video versejā, kas pasauļa pyrmizruodi pīdzeivuojuse ituo goda vosorā, pīsadola ari eipašais gosts – Sovvaļnīks aba Ingars Gusāns.

3. Četru dzīšmu video versejis i “Lombards”

Pošu spākim grupa sataisejuse video versejis vairuokom albuma “Nasoki nikuo” dzīsmem – “Ehtī”, “Bļaunu”, “Putneni”, taipat ari dzīsmei “Speizdeiguos acs”, kas ir kai veļtejums pošim sev pīcu godu jubilejā. Taipat Juoņs Kuzminskis kūpā ar dūmubīdrim ituo goda vosorā suocs dorbu pi komedejkinys “Lombards” par dzeivi pīrūbežā. Kinys “Lombards” golvonais mierkis ir popularizēt latgalīšu muzyku, i tymā leluokū daļu fiļmēsīs latgalīšu muziki, kurūs radeituo i izpiļdeituo muzyka ari skanēs tymā. Jaunajā kinā varēs redzēt grupys “Metrs” dalinīkus Uldi Ruļuku, Guntaru Šembeli, Andreju Zelču i Edmundu Tamani, Valdi Vucānu i Juri Vucānu nu “Bez PVN”, Kasparu Čaksti nu “Oranžās Brīvdienas”, grupys “Gandreiž 10nīkā” vysus dalinīkus – Juoni, Imantu, Vitāliju i Aiju. Jaunajā kinā varēs redzēt ari vysus “Unknown Artist” puišus (Nauri, Arni, Raimondu, Māri), kai ari Ingaru Gusānu i Mareku Gusānu, Valteru Murānu (nu apvīneibys “Ausmeņa Records”), fiļmēsīs TV personeibys – ChaulaTV vadeituojs Eriks Saksons i žurnaliste Evika Muizniece, ukraiņu muzikis i gitarspielis pasnīdziejs Sergejs, kai ari daudzi cyti – draugi, rodi, bārni i t.t.  Kinys “Lombards” pyrmizruode varātu byut 2019. goda pavasarī/vosorā, bet dreiži teik sūleits komedejkinys treilers.

Vaira par komedeju “Lombards”:

https://www.lakuga.lv/2018/07/26/latgalisi-uzjam-komedeju-par-dzeivi-pirubeza/

https://www.facebook.com/komedija.lombards

4. AttAck gitarys

Grupa “Gandreiž 10nīkā” muzykalajā darbeibā izmontoj eipašys – AttAck – gitarys, kas ir poša Juoņa Kuzminska dorbs. Dažaida veida gitarys piec individuala pasyutejuma teik taiseitys tīpat Kaunatys pogostā. Tuos dabuojušys atzineibu nu daudzu muziķu kai Latvejā, tai cytur pasaulī. “Attack” gitarys spieļoj gitaristi ari grupuos “Dabasu Durovys”, “Green Novice”, “Skyforger”, “Oranžās Brīvdienas”, “Echoreason” (ASV) i cytuos. Godā videji Juoņa darbneicā tūp 10–12 gitarys. Juoņs par sovom gitarom sajiems ari Latgalīšu kulturys goda bolvu “Boņuks 2014” nominacejā “Goda amatnīks/saiminīks”.

Vaira par gitarom: https://www.facebook.com/attackguitars/

5. Sapyns par festivalu “Summer Sound” i prestižais restorans “36. līnija”

Kotra grupys uzastuošona ir eipaša, bet 2018. goda koncerti “Gandreiž 10nīkā” muzikim paliks eipaši atmiņā – pīpiļdeits sapyns par pīsadaleišonu festivalā “Summer Sound” Līpuojā, taipat dzīduojuši Bauskys piļsātys svātkūs i vīnā nu prestižuokūs Jiurmolys restoranu “36. līnija”, kur sporta klasis katamaranu pasauļa čempionatā grupys publika beja nu vysa pasauļa. “Gandreiž 10nīkā” soka, ka leluokī sasnāgumi, saprūtams, vēļ tik prīškā, bet jau niu lepojās, ka jūs dzīsmis skaniejušys daudzuos radeju stacejuos vysā Latvejā – Radio SWH, Radio PIECI, Latvejis Radejā, Radio NABA, Divu krastu radio i cytuos.

Dzeivuot leidza grupys aktivitatem socialajā teiklā Facebook var grupys lopā https://www.facebook.com/g10rock/

Karteite nu grupys arhiva.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu. Roksts sagataveits sadarbeibā ar bīdreibu “Latgolys Producentu Grupa”.

Print Friendly, PDF & Email

Nūtikšonu kalendars

May
25
Tre
16:00 Maja dzīduojumi pi krysta ar etn... @ Vabalis krysts
Maja dzīduojumi pi krysta ar etn... @ Vabalis krysts
May 25 @ 16:00 – 17:30
Majs katuoļu bazneicys kalendarā ir Svātuos Jaunovys Marijis mieness – laiks, kod Vabalē teik izpuškuoti ceļa molys krysti i nūteik maja dzīduojumi. Ari itūgod, saglobojūt vīnu nu namaterialuo kulturys montuojuma tradiceju, pogosta ļauds teik aicynuoti[...]
May
26
Cat
19:00 Daņču vokors ar folklorys kūpu “... @ Augšdaugovys nūvoda kulturys centrs "Vārpa"
Daņču vokors ar folklorys kūpu “... @ Augšdaugovys nūvoda kulturys centrs "Vārpa"
May 26 @ 19:00 – 21:00
Daņču vokors ar folklorys kūpu "Dyrbyni" @ Augšdaugovys nūvoda kulturys centrs "Vārpa"
Leidza: ārtys mainis kurpis doncuošonai, dzeramais iudiņs. Daleiba breiva.
May
27
Pīk
15:00 Diskuseja par Latgolys parka att... @ Reiga
Diskuseja par Latgolys parka att... @ Reiga
May 27 @ 15:00 – 17:30
Diskuseja par Latgolys parka atteisteibu @ Reiga
Reigys dūme piec latgalīšu navaļstiskūs organizaceju rūsynuojuma lāmuse Moskovys duorzu Reigā puorsaukt par Latgolys parku. Kab dūmuotu, kai reizē ar itom puormaiņom parku padareit par pīviļceiguoku teritoreju i īspieju reidzuonim car tū vaira izzynuot par[...]
16:00 Storptautyskuo Latgolys grafikys... @ Daugovpiļs Marka Rotko muokslys centrs
Storptautyskuo Latgolys grafikys... @ Daugovpiļs Marka Rotko muokslys centrs
May 27 @ 16:00 – 17:30
Simpozeju producej bīdreiba SIVIA, i jau ostoitū reizi tys nūteik kai daļa nu Daugovpiļs Marka Rotko muokslys centra simpozeju programys. Tys turpynoj grafikys muokslys medeja īdzeivynuošonu Daugovpilī i Latgolys vuorda nesšonu storptautyskai car grafiku aktivitatem[...]
20:00 Jura Ostrovska koncerts @ Tiļžys kulturys i viesturis noms
Jura Ostrovska koncerts @ Tiļžys kulturys i viesturis noms
May 27 @ 20:00 – 22:00
Jura Ostrovska koncerts @ Tiļžys kulturys i viesturis noms