Muokslinīka Juoņa Plivdys jubilejis gleznu izstuode par Latgolys ainovu

Muokslinīka Juoņa Plivdys jubilejis gleznu izstuode par Latgolys ainovu

Roksta autors: Ināra Volkova, žurnals “A12”

Juoņs Plivda īt nu Preiļu pusis. Jau bierneibā pasaruodejuši pyrmī naapzynuotī mieginuojumi zeimēt, bet profesionalitate gleznīceibā ir apgiuta Rēzeknis Muokslys i dizaina vydsškolā, pabeidzs školu ar diplomdorbu “Negaiss”, dorba vadeituojs muokslys profesors Osvalds Zvejsaļnīks. Piec tam studiejs Latvejis Muokslys akademejā. Nu 1998. gods J. Plivda aktivi pīsadola izstuodēs Latvejā i uorzemēs, veidoj personalizstuodis. Pyrmū sovu dorbu izstuodi J. Plivda sareikuoja gruomotu nomā “Latgale” Preiļūs 1998. godā.

Pādejūs godu laikā muokslinīks pīsadola radūšajūs plenerūs, izkūpūt i sleipejūt sovu gleznuošonys rūkrokstu. Kruosaineiba, ekspreseja i rudineigs spūdrums ir Juoņa atainuotajuos Latgolys ainovuos, azaru īplokuos, pakolnūs i bazneicu tūrņūs. Ainovys Juoņam ir vystyvuokuos, jamuos var īraudzeit vairuok nūkruosu i nūskaņu, meiluokī godalaiki ir rudiņs i pavasars, kuri lutynoj ar zaļgoni okereigim i syltim tūnim. Muokslinīka profesionalūs sasnāgumus atzeimej 2017. godā dabuotuo Latgolys gleznuotuoja J. Pīgožņa bolva Latvejis ainovu gleznīceibā. Nu septiņu izvierzeitūs bolvys pretendentu Juoņa “Gaiļmuiža” tyka nūvārtāta ar augstuokū atzineibu – Juoņa Strupuļa veiduotū laureata medaļu, Zalta diplomu i Preiļu nūvoda dūmis naudys bolvu 3000 eiro.

Par sovu radūšū darbeibu muokslinīks soka: “Gleznīceiba, kū rodu, ir cīna i mīlesteibys aplīcynuojums centralajai temai, kura teik rysynuota pīsuotynuotajuos kompozicejuos, i tei ir doba. Ainova, kai patstuoveiga vierteiba i laika apjausmys līcyneica spiej caur muokslys volūdu pasaceit daudz vairuok, nakai kaidam tys varātu redzētīs. Iz jū var pasavērt kai aktu – tei ir sovu īškejūs puordzeivuojumu i emoceju pasauļa puornesšona muokslā.”

Sovys prasmis muokslinīks eistynoj, struoduodams par pedagogu Rēzeknis Muokslys i dizaina vydsškolys Muokslu nūdaļā. Juoņam pateik dorbs školā, tys ļaun pošam radūši atsateisteit. Muokslinīka 40 godu jubilejis izstuode “Atspulgi” apsaverama Rēzeknis Muokslys i dizaina vydsškolys Boltajā zalē da 14. februara. Pelieceigi boltū zīmu var īkruosuot muokslinīka īdvasmojūšā gleznu realitatē.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.

Print Friendly, PDF & Email

Nūtikšonu kalendars