Roksta autors: portals lakuga.lv

“Latgalīšu kulturys ziņu portals lakuga.lv” sajiems Vaļsts kulturkapitala fonda finansiejumu portala darbeibys nūdrūsynuošonai turpmuokajim mienešim. Pavasars atness izmainis ari portala redakcejā – turpmuok lakuga.lv vadeis Sandra Ūdre.

Portala lakuga.lv darbeibys nūdrūsynuošonai juo eipašnīks bīdreiba “Latgolys Studentu centrs” regulari pīsaista finansiejumu dažaidūs projektu konkursūs. Vaļsts kulturkapitala fonds daškiers finansiejumu lakuga.lv satura sagataveišonai leidz 2019. gods 31. juļam.

“Sajimtais finansiejums ļaun portalam “izdzeivuot”, tok na atsateisteit. Dīmžāļ Vaļsts kulturkapitala fonda projektu konkursūs projektu idejom teik daškierts tikai dalejs finansiejums, kas nadūd īspieju eistynuot vysys īceris i planavuot portala darbeibu ilgtermiņā. Nasaverūt iz tū, nūviertejam mums snāgtū atbolstu,” soka projekta vadeituoja Vineta Vilcāne. “Lakuga.lv pastuoviešona ir svareiga na tikai pošim latgalīšim, tok kūpumā vysai Latvejis sabīdreibai. Ar sovu darbeibu portals sagloboj latgalīšu volūdu, veicynoj juos lītuošonu, gon ari ceļ volūdys prestižu. Cerim, ka tyvuokajā nuokūtnē tiks izveiduota ilgtermiņa programa latgaliski rokstūšu medeju atbolstam, kas dūs īspieju sajimt finansiejumu na iz dažim mienešim, bet ilguokam laika periodam. Stabils finansiejums dūs īspieju izveiduot patstuoveigu komandu i atteisteit portala saturu, padorūt jū daudzveideiguoku, modernuoku i interesantuoku.”

Dūmojūt par portala atteisteibu, 2018. gods suokumā tys tyka registrāts kai medejs. “Latgalīšu kulturys ziņu portals lakuga.lv” vys vēļ ir vīneigais medejs Latvejā i pasaulī, kura saturs teik veiduots tikai latgalīšu rokstu volūdā.

Turpmuok leidzšinejuos portala redaktoris Vinetys Vilcānis prūmbyutnis laikā lakuga.lv vadeis Sandra Ūdre, kurei portala komanda kai žurnaliste pīsavīnuoje pārnejuo gods vosorā. S. Ūdre studiejuse filologeju Rēzeknis Augstškolā, specializiejusēs latgalīšu rokstu volūdā, struoduojuse Latgolys Kulturys centra izdevnīceibā, redigej izdavumus i veidoj rokstus žurnalam “A12”.

Portala jaunumim var sekuot leidza socialajā teiklā facebook.com, portala redakceja uztur ari latgalīšu volūdai izveiduotū Instagram kontu @voluuda.