Roksta autors: portals lakuga.lv

Sevkurs latgalīšu volūdys draugs i entuziasts ir aicynuots 9. novembrī uzraksteit diktatu latgalīšu rokstu volūdā. Tys itūgod nūtiks jau trešū reizi, sasadorbojūt Latgalīšu kulturys ziņu portalam i Latvejis Radejis Latgolys studejai. Diktats skanēs Latvejis Radejis 1 raidejumā “Kolnasāta” pl. 18.15, bet uzraksteitū tekstu varēs puorbaudeit portalā lakuga.lv.

Pasauļa diktats latgalīšu rokstu volūdā itūgod nūtiks jau trešū reizi. Ideja par tuo veiduošonu roduos portala lakuga.lv redaktorei Vinetai Vilcānei ar mierki aktualizēt latgalīšu volūdys lītuojumu i pīvērst sabīdreibys uzmaneibu raksteitprasmei latgaliski. Koč ari īspiejis vuiceitīs latgalīšu rokstu volūdu ir stipri īrūbežuotys, tys namazynoj sabīdreibys gribiešonu komunicēt latgaliski, eipaši jaunuokuo paaudze tū izavielej kai sazinis volūdu dažaidūs socialajūs medejūs.

Latgalīšu volūda itūšaļt teik aktivi izmontuota dažaiduos kulturys izpausmēs, kai muzykā, literaturā, kino i teatrī, medejūs, ari turismā i uzjiemiejdarbeibā. Saskaņā ar pādejuos tautys skaiteišonys datim kasdīnā latgalīšu rokstu volūdu, kas ir viesturisks latvīšu volūdys paveids, izmontoj ap 8,8% Latvejis īdzeivuotuoju.

Pasauļa diktats latgalīšu rokstu volūdā trešū reizi skanēs 9. novembrī 18.15 stuņdēs Latvejis Radejis 1. programys latgaliskajā raidejumā “Kolnasāta” (vysuos LR1 frekveņcēs i internetā vysā pasaulī). Diktatu byus īspiejams pīraksteit, ari pīsaslādzūt socialajā teiklā Facebook.com Lagolys studejis kontam facebook.com/LatgalesStudija. Sevkurs interesents seve pīraksteitū tekstu varēs puorbaudeit portalā lakuga.lv ci ari uzraksteitū tekstu īsyuteit eipašā tīšsaitis sistemā i sajimt atbiļdi e-postā jau ar klaidu lobuojumim.

Raidejuma “Kolnasāta” vadeituojs Ēriks Zeps, aicynojūt raksteit diktatu, soka:

“Navajag uzatraukt par sovom rokstu volūdys zynuošonom. Saprūtams, ka daudzim nu myusu, ari maņ, tuos nav speidūšys, jo nav bejuse vareiba latgalīšu volūdu vuiceitīs školā. Diktata raksteišona vaira ir kai pīdzeivuojums i ari aplīcynuojums latgalīšu volūdys eksistencei, pīruodejums tam, ka latgalīšu rokstu volūda ir tikpat skaneiga i vierteiga kai latvīšu literaruo volūda.”

Itūgod diktatam izraudzeits fragments nu Egitys Kancānis stuostu gruomotys “Syltuo mola”, tū skaiteis muziks, grupys “Baritoni” dalinīks Muorteņš Strods. Diktata teksts sagataveits, īvārojūt 2007. godā apstyprynuotūs Latgalīšu raksteibys nūsacejumus.

Diktatu finansiali atbolsta Latvejis Radeja i bīdreiba “Latgolys Studentu centrs” projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (projekta leigums Nr. 778384).

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.