Roksta autors: portals lakuga.lv

Dreizumā pi laseituoju datiks Kruoslovys Viesturis i muokslys muzeja saryupāta gruomota “Nu sakneitis lozda zīd”. Tys ir jau myužeibā aizguojušuos školuotuojis i nūvoda pietneicys Annys Vagalis folklorys i etnografiskūs materialu vuokums dzymtajā Kombuļu, ari Aulejis i agruokajā (pyrmskara) Skaistys pogostā.

Vairuok par gaidomū gromotu “Nu sakneitis lozda zīd” stuosta gruomotys sastateituoja i izdūšonys projekta vadeituoja, Kruoslovys Viesturis i muokslys muzeja viesturis specialiste Baiba Mileika: “90. godu beiguos, myuža nūgalē, myusu nūvadneica školuotuoja Anna Vagale muzejam paduovynuoja sovus materialus. Tai jī muzeja kruojumūs ilgus godus globuojuos. Pīrakstejom projektu gruomotys izdūšonai, lai ar tū varātu īsapazeit daudz plašuoks laseituoju lūks.

Gribīs pastreipuot gruomotys zynuotniskū vierteibu, tekstu kuortuošonā saguoja lobi sasadorbuot ar izdavuma literarū redaktori i korektori LU profesori Lideju Leikumu. Jei par padūmdeviejim gruomotys izstruodē īsaisteja izcylu komandu, asam pateiceigi Otilejai Kovalevskai, Aleksejam Andronovam, Dainai Blažēvicai, Marutai Latkovskai, Tatjanai Ļaksai, Annai Mileikai, Annai i Stanislavam Promim, Sandai Rapai, Beatrisei Reidzānei, Voiceham Smočyņskam, Ritai Treijai, Antrai Upeniecei, Birutai Sylavai,  taipat vysim cytim, kas tai voi cytaiži ir veicynovuši ituos gruomotys atīšonu.”

Gruomotys nūsaukums „Nu sakneitis lozda zīd“ ir simbolisks. A. Vagalis boguoteigais vuokums suokts 15 godu vacumā, tei ir loba līceiba juos agreimai puorlīceibai par eistom vierteibom: cīneit sovu tāvu zemi i sorguot, globuot dzymtū volūdu i kulturu. Partū kruojums izguojs boguots i daudzveideigs: tautys dzīsmis, puorsokys, rūtalis, parunys, meiklis, ticiejumi, etnografiska rakstura pīzeimis, dialektologejis materiali, vītu nūsaukumi. Sastateita i tematiska apvyda vuordu vuordineica.

Gruomota sagataveita projekta “Grāmatas “Nu sakneitis lozda zīd” izdošana.  Annas Vagales folkloras un etnogrāfisko materiālu vākums Krāslavas apkaimē” ītvorūs ar Vaļsts Kulturkapitala fonda, “Latvijas Valsts meži”, Latgolys regiona atteisteibys agenturys i Kruoslovys nūvoda dūmis finansialu atbolstu.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.