Kur pazuds Preiļu slimineicys latgaliskais uzroksts?

Kur pazuds Preiļu slimineicys latgaliskais uzroksts?

Roksta autore: Vineta Vilcāne, portals lakuga.lv

Vairuoku mienešu garumā Preiļu poliklinkys apmaklātuojus registraturā sveicynuoja latgaliskys uzroksts “Esi vasals!”. Zvonūt iz registraturu, latgaliski atskanēja automatiskuo atbiļde. Niu vaira nav ni uzroksta, ni atbiļdis latgaliski. Portals lakuga.lv devēs iz Preilim nūskaidruot, kur tī palykuši.

Latgaliskais uzroksts kai daļa nu slimineicys identitatis

Preiļu poliklinikys registraturā uzrokstu “Esi vasals!” pastateja 2018. gods decembrī, tei beja SIA “Preiļu slimnīca” īprīkšejuos vaļdis iniciativa, piec juos īrūsynuojuma tyka izveiduota ari automatiskuo telefona atbiļde latgalīšu volūdā, kas piec atbiļdis latvīšu literarajā volūdā, atskanēja zvonūt iz registraturu.

2019. gods majā slimineicys vaļdi atlaide, storp vaļdi i Preiļu nūvoda dūmi, kas ir uzjāmuma kapitaļdalu turātuojs, beja izaveiduojs konflikts. Juoatzeimoj, ka bejušuo Preiļu slimineicys vaļdis prīkšsādātuoja Iveta Stare ir ari Preiļu nūvoda dūmis opozicejis deputate, jei īprīkš medejūs pauduse, ka vaļdis atlaisšona, bejuse politiska izariekinuošona, sovukuort Preiļu nūvoda dūme, kai atlaisšonys īmesli miniejuse švaku uzjāmuma puorvaļdeibu. Niu SIA “Preiļu slimnīca” voda Skaidrīte Žukova, i jaunuo slimineicys vaļde lāmuse nūjimt latgaliskū uzrokstu i automatiskū atbiļdi.

Par ideju pastateit uzrokstu “Esi vasals!” i latgaliskū telefona atbiļdi īprīkšejuo slimineicys vaļdis prīkšsādātuoja Iveta Stare stuosta: “Kod suocem struoduot, myusim beja svareigi saprast, kas ir itys uzjāmums, kaidi ir mierki i vierteibys. Munupruot, ir cīši svareigi apsazynuot identitati, cylvākam ir vīgluok pījimt tū grupu, kurai jis pīder. Maņ ruodejuos svareigi, veiduot uzjāmuma identitati, gon īkšejū, gon uorejū tālu. Attīceibā iz latgaliskū Latgolys symtgadis kongress beja lobs stimuls i vīla puordūmom.

Tai kai uzjāmumā daudzi darbinīki sovā storpā runoj latgaliski, ari pacienti puorsvorā runoj latgaliski, tod ruodejuos dabiski latgalīšu volūdu itegrēt uzjāmumā.”

I. Stare soka, ka slimineicys darbinīkim i klientim patics uzroksts “Esi vasals!”. “Nu suokuma tys ruodejuos tikai kai sveicīņs, bet byuteibā tys ir viestejums ar dziļu nūzeimi. Tys ir na tikai sveicīņs, īejūt ākā, bet ari pasoka, ka ite pasaryupēs par tovu veseleibu, tev paleidzēs,” pībylst I. Stare.

Lāmums par latgaliskuos uzrunys īkļaušanu automatiskajā atbyldātuojā tics pījims, konsultejūtīs ar darbinīkim, kuri tū atbaļstejuši. “Es dūmoju, ka tys ir jauki, ka mes apsazynojam latgaliskū genu caur jūkim, pozitivismu, tys dora myusu kasdīnu spylgtuoku, pateikamuoku. Pozitivys emocejis īt tikai par lobu. Tierga konkurencis apstuokļūs ir svareigi byut ar koč kū unikalim,” soka bejušuo Preiļu slimineicys vaļdis prīkšsādātuoja.

Slimineicys apmaklātuoji syudziejušīs par atbiļdi latgaliski

Naseņ uzroksts “Esi vasals!” tyka nūjimts nu sīnys pi poliklinikys registraturys, ari automatiskajā atbyldātuojā vaira naskaņ latgalīšu volūda, niu atbiļde ir tikai latvīšu literarajā volūdā. Iz vaicuojumu, parkū pījimts lāmums par latgaliskuo teksta izjimšonu nu automatiskuo atbyldātuoja, SIA “Preiļu slimnīca” vaļdis prīkšsādātuoja Skaidrīte Žukova atsoka:

“Syudzeibys [nu klientu – V. V.] beja par tū, ka ir ilgi juogaida [savīnuojums – V. V.], dūmojūt par pacientu ierteibom, mes saeisynuojom laiku, jo syudzeibu beja cīši daudz.”

Juoatzeimoj, ka fraze latvīšu literarajā volūdā automatiskajā atbyldātuojā ir viņ devenis sekundis gara, tikpat gara aptuveni tei varēja byut ari latgaliski, taitod kūpā ap 18 sekunžu. Kai līcynoj roksta autoris personeiguo pīredze, zvonūt iz Preiļu poliklinikys registraturu, kab pīsaraksteitu iz izmekliejumu, na vysod savīnuojums ar registaturys darbinīku nūteik iz reizis, taipoš ir juogaida, kod darbinīkam byus vareiba iz zvonu atsaceit. Saleidzynuojumam, Rēzeknis slimineicys zvonu centra automatiskuo atbiļde ir ostonis sekundis, garuoka tei ir, zvonūt iz Jākubpiļa regionaluos slimineicys vīnuotū telefonu – 42 sekundis, jo pyrma juoizavielej sarunys volūda – latvīšu ci krīvu, piec tam pakalpuojuma veids, kuru grib sajimt.

2019. gods 21. oktobris. Karteņa: Vineta Vilcāne, portals lakuga.lv
2019. gods 11. decembris. Karteņa: Vineta Vilcāne, portals lakuga.lv

S. Žukova stuosta, ka poliklinikys apmaklātuojim bejuse ari napatyka pret uzrokstu “Esi vasals!”. Kai uzroksta nūjimšonys īmesli, vaļdis prīkšsādātuoja miņ napīcīšameibu izvītuot uorstu pījimšonys kabinetu sarokstu. “Dūmojūt par pacientu ierteibom, iz tuos sīnys, kur beja tys uzroksts, niu ir stends, kab pacients var ārtai nūskaidruot [vajadzeigū informaceju – V. V.]. Iz vīnys sīnys ir uorstu grafiks i tepat pasagrīžūt redz, kur uorsts atsarūn. Planavuojums ir vajadzeigs piec nūsacejumu, leidz ar tū sīna tyka atbreivuota. Uzroksts nikur nav pazuds, jis ir PSFIT [Slimineicys medicinys fitnesa centrs – V. V.] telpuos. Jis nav izmasts,” skaidroj S. Žukova.

Īprīkšejuo SIA “Preiļu slimnīca” vaļdis prīkšsadātuoja Iveta Stare nūruoda, ka laikā, kod jei vadeja uzjāmumu, syudzeibu nu pacientu par latgaliskū uzrokstu i automatiskū atbiļdi latgaliski nabejs. Bejuse ari izvītuota vysa napīcīšamuo informaceja, kai tū paredz lykumdūšona, uzjāmumu regulari puorbaudejuse Veseleibys inspekcija, i aizruodejumu nabejs.

Roksta autorei nabeja vareiba puorsalīcynuot par latgaliskū uzrokstu medicinys fitnesa centrā. 20. decembrī, kod autore gasteja slimineicā i tykā ar tuos puorstuovjim, nabeja īspiejams tikt telpuos, kur niu atsarūn “Esi vasals!”, – atbiļdeiguo persona, pi kurys globojās atslāgys, beja davysēs atvalinuojumā.

Latgalīšu volūdu vaira naredz, kai daļu nu uzjāmuma

SIA “Preiļu slimnīca” vaļdis prīkšsādātuojis Skaidrītes Žukovys atbiļde iz vaicuojumu, kaida ir uzjāmuma politika attīceibā ir latgalīšu volūdys lītuošonu, ir lakoniska:

“Es uzskotu, ka ar latgalīšu volūdu ir juonūsadorboj izgleiteibys īstuodem, navys veseleibys apryupis īstuode dūmuos par tuos populariziešonu. Īspieju rūbežuos. Mes niu naīsim koč kū īguļdeit i dūmuot par itū.”

Vaicojūt, kaida ir attīksme pret komunikaceju latgaliski, S. Žukova soka: “Kotram ir breiva izvēle, kai jis grib, tai komunicej, nivīns naīrūbežoj, prūtams, ka breivā vaļstī navar īrūbežuot, kaidā volūdā komunicej.”

Juoatzeimoj, ka atsevišķuos Eiropys vaļstīs regionaluos volūdys, par kaidu skaitoma ari latgalīšu volūda, teik integrātys veseleibys apryupis sistemā. Tai tys, pīmāram, ir ar frīzu volūdu Nīderlandē. Tī veseleibys apryupis specialisti nūvāruojuši, ka pacientim ir vīgļuok izasaceit sovā dzymtajā volūdā, frīzu, navys nīderlandīšu, eipaši tys atsatīc iz godūs vacuokim cylvākim. Nīderlandis pīredze ari ruoda, ka, dzieržūt dzymtū volūdu, pacientam ir leluoka uzticeiba uorstam i jis jiutās komfortabluok. Frīzlandis proviņcē struodoj pi tuo, kab medicinys personals, kuram frīzu volūda nav dzymtuo, spātu ar pacientiem sasaprat frīziski.

Dūmojams, ka daudzi pacienti, kurim latgalīšu volūda ir dzymtuo volūda, Latgolā izavielej ar sovu uorstu runuot latgaliski. Tok nabyutu švaki, ka uorstnīceibys īstuodis ar sovu attīksmi atbaļsteitu i ari veicynuotu latgalīšu volūdys lītuošonu. Nu tuo īgiutu na tikai pacienti, bet palīlynuotu ari volūdys vierteibu i caltu tuos prestižu.

Roksts sagataveits projektā “Latgales kultūrtelpa: problēmas, analīze un atspoguļojums portālā lakuga.lv”. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars

Sep
24
Pīk
18:00 “Dailes Kanona” pyrmais koncerts... @ Latgolys viestnīceiba "GORS"
“Dailes Kanona” pyrmais koncerts... @ Latgolys viestnīceiba "GORS"
Sep 24 @ 18:00
"Dailes Kanona" pyrmais koncerts - veļtejums Bronislavai Martuževai @ Latgolys viestnīceiba "GORS"
Nu 3. augusta Dailis teatris aicynoj iz septeņu koncertu cyklu “Dailes Kanons”, kuruo pyrmajā koncertā izskanēs veļtejums Bronislavai Martuževai aktrisis Olgys Dregis skaiteitajā dzejā i pianista Edgara Cīruļa spālātajā Imanta Kalniņa muzykā. “Dailes Kanons” ir[...]
Sep
26
Svā
10:00 Seminars “Latgales kultūrtelpas ... @ Rēzeknis Tehnologeju akademeja
Seminars “Latgales kultūrtelpas ... @ Rēzeknis Tehnologeju akademeja
Sep 26 @ 10:00 – 16:00
Seminars "Latgales kultūrtelpas identitātes jautājumi un tās aktuālie izaicinājumi" @ Rēzeknis Tehnologeju akademeja
Latgalīšu kulturys bīdreiba 26. septembrī aicynoj iz seminaru “Latgales kultūrtelpas identitātes jautājumi un tās aktuālie izaicinājumi”. Vaira informacejis par seminaru ITE. Dasasaceišona seminaram, rokstūt epostu iz latgalisubidreiba@gmail.com.
15:30 Nikodema Rancāna bolvys padūšona... @ Rēzeknis Tehnologeju akademeja
Nikodema Rancāna bolvys padūšona... @ Rēzeknis Tehnologeju akademeja
Sep 26 @ 15:30
Nikodema Rancāna bolvys padūšona Latgolys izcyluokajim pedagogim @ Rēzeknis Tehnologeju akademeja
26. septembrī Rēzeknis Tehnologeju akademejā (RTA) padūs Nikodema Rancāna bolvy Latgolys izcyluokajim pedagogim.  Seši školuotuoji sajims eipašu Riharda Cibļa darynuotu saktu, kas jau palykuse par tradicionalu ituo konkursa bolvu. Bolva – sudobra pokovsakta – ir[...]
Oct
2
Sai
18:00 Grupys “Baltie lāči” koncertprog... @ Krustpiļs Kulturys noms
Grupys “Baltie lāči” koncertprog... @ Krustpiļs Kulturys noms
Oct 2 @ 18:00
Grupys "Baltie lāči" koncertprograma "Tirgus stāsti" @ Krustpiļs Kulturys noms
Grupa “Baltie lāči” aicynoj iz jaunu koncertprogramu “Tirgus stāsti”. Itymā naparostajā tiergā ir vareiba saklauseit i izjust vysu, kū sirds gryb – gon dzīsmis i dzeju, gon smīklus i osorys. Ar dzīsmem i dzeju izdaiļuots,[...]
19:00 Gundegas Rancānes gleznu izstuod... @ Latgolys Kulturviesturys muzejs
Gundegas Rancānes gleznu izstuod... @ Latgolys Kulturviesturys muzejs
Oct 2 @ 19:00
Gundegas Rancānes gleznu izstuode "Klātesot" @ Latgolys Kulturviesturys muzejs
Laikā nu 8. septembra leidz 2. oktobram Latgolys Kulturviesturis muzejā var apsavēr pavasarī Covid-19 īrūbežuojumu dieļ atcaltū muokslinīcis Gundegys Rancānis gleznu izstuodi “Klātesot”. Izstuode atspīgeļoj G. Rancānis vierteibys gleznīceibā, kur vysu leluokuo nūzeime ir koloritam,[...]