Rokstu sagataveja: portals lakuga.lv

Kruoslovys Viesturis i muokslys muzejs 31. janvarī aicynoj iz gruomotys “Nu sakneitis lozda zīd: Annys Vagalis folklorys i etnografiskūs materialu vuokums Kruoslovys apleicīnē” attaiseišonys svātkim, portalu lakuga.lv informej muzeja puorstuove Baiba Mileika.

Koč latgalīšu volūdai jau nu 18. godu symta vyds ir sova literaruo rokstu tradiceja, kasdīnys saziņā Latgolā dominej izlūksnis. Kai specifiska paruodeiba vītejūs ļaužu volūda dzeivoj mutvuordu dailradē. Tautys kulturys vierteibu saglobuošona i nūdūšona tuoļuok ir svareigs faktors latgaliskuos mentalitatis i regionaluos identitatis styprynuošonai, volūdys dzeivuotspiejis nūdrūsynuošonai.

“Nūzeimeigs ir školuotuojis i nūvodpietneicys Annys Vagalis latgalīšu folklorys, etnografiskūs materialu i vītvuordu vuokums Kruoslovys pusē, precizuok, Kombuļu, Aulejis i pyrmskara Skaistys pogostā. Nūvoda garamontu pīraksteišonai veļteita myuža leluokuo daļa, i kruojums saguojs daudzveideigs: tautysdzīsmis, puorsokys, rūtalis i parunys, meiklis, ticiejumi, etnografiska rakstura pīzeimis, dialektologejis materiali, vītu nūsaukumi. Sastateita ari tematiska apvydvuordu vuordineica,” par jaunū gruomotu stuosta B. Mileika.

Bogoteigais vuokums aplīcynoj A. Vagalis jau agri īmontuotū puorlīceibu par patīsom vierteibom: cīneit sovu tāvu zemi i sorguot, globuot dzymtū volūdu i kulturu.

Myuža nūgalē školuotuoja Anna Vagale sovu kruojumu paduovynuoja Kruoslovys Viesturis i muokslys muzejam, kab tys tyktu tī saglobuots i “pasorguots nu aizmiersteibys dzymtajā nūvodā”. Daļa manuskripta kopeju ir nūdūtys Kombuļu pogosta bibliotekai, itī rūkroksti ir īskenāti i daīmami elektroniski.
Gruomotys prezentaceja nūtiks 31. janvarī 17.00 stuņdēs Kruoslovā, Omotu sātā (Piļs īla 10).