Leivuona nūvodā nūtiks storptautiskais masku festivals

Leivuona nūvodā nūtiks storptautiskais masku festivals

Rokstu sagataveja: portals lakuga.lv

Itūgod XXI Storptautiskais masku tradiceju festivals nūtiks Leivuona nūvodā 15. i 16. februarī. Festivala programā paradzāti masku guojīni ar eistim ritualim i nūrisem laiku sātuos, portalu lakuga.lv informej pasuokuma organizatori. Festivalā gaidomi ari tuoli gosti – Afrikys mītiskūs masku grupa nu Kamerunys.

XXI Storptautiskuo masku tradiceju festivala programā paradzātys aktivitatis Turku i Rūžupis pogostūs, improvizātys masku izruodis Leivuona nūvoda kulturys centrā, Metiņa dzeišona, Lelais masku guojīņs iz Tradiceju kolnu i nūslāguma rituals. Eipaši atraktiva i aizraujūša byus individualūs masku izruodeišona. Interesanta i izzinis bogota sūluos byut maksu tematikai veļteituo konferņce i meistardarbneicys Leivuona nūvoda kulturys centrā. Tymā dažaidu Latvejis nūvodu i ari uorvaļstu grupys i specialisti stuosteis par tradicejom i demonstrēs masku gataveišonu. Tīpat byus ari apsaverama masku ekspoziceja.

Festivalā pīsadaleis 24 masku grupys nu Reigys, Tārgalis, Smiļtinis, Limbažu, Katlakolna , Mārupis, Mālpils, Ūgris, Vidrižu, Suntažu, Salacgreivys, Saulkrostu, Dagdys, Tiļžys, Gaļānu, Preiļu, Kolupa, i juos ruodeis dažaidys maskuošonuos tradicejis. Kotrā Latvejis vītā maskuošonuos daleibnīkus sauc cytaiž, partū varēs satikt budieļus, čyguonus, bukus, kaitys, pakukus, kekatys, vecīšus, Katrinys bārnus, vecajus aba paurīšus, Vydzemis čyguonus, Zīmyssvātku čyguonus i cytys grupys. Iz festivalu atbrauks ari pīcys masku grupys nu uorvaļsu – Igaunejis, Boltkrīvejis, Krīvejis, Leitovys i ari Afrikys mītiskūs masku grupa nu Kamerunys.