Roksta autors: portals lakuga.lv

13. februarī Smitsona institutā Vašingtonā (ASV) nūtiks lekceja “Vairuok ci mozuok apdraudātūs Baltejis volūdu ortografejis, identitatis i ideologejis”, kurymā profesors Tomašs Viherkevičs stuosteis par latgalīšu volūdu.

Sovā lekcejā Adama Mickeviča Universitatis Poznaņā (Pūleja) profesors, sociolingvists Tomašs Viherkevičs pīsagrīzs latgalīšu i Leitovā asūšuos žemaišu volūdys ortografejis vaicuojumim. Profesora T. Viherkevičs uzmaneibys lūkā latgalīšu volūda jau ir vairuokus godus, 2019. godā jis gasteja Latvejā i sovys vizeitis laikā tykuos ar latgalīšu kūpīnys puorstuovim, kab izprostu jūs attīksmi pret latgalīšu volūdys ortografejis vaicuojumim. Ituo pietejuma rezultati tiks atspīgeļuoti ari lekcejā “Vairuok ci mozuok apdraudātūs Baltejis volūdu ortografejis, identitatis i ideologejis”. Sovā prezentacejā T. Viherkevičs eipašu uzmaneibu veļteis gruomotu raksteituoja Andryva Jūrdža, kuram itūgod tiks svieteita 175. jubileja, atstuotajam montuojumam, portalam lakuga.lv atkluoj profesors.

Sociolingvista Tomaša Viherkeviča zynuotniskūs interešu lūkā ir taidi vaicuojumi kai mozuoklītuotūs volūdu politika i planavuošona, reginaluos i papyldu volūdys, volūdu apdraudieteiba i atdzeivynuošona, ortografejis vaicuojumi i attīksme pret tim.

2019. godā T. Viherkevičs pīsadaleja Latgolys dīnai veļteitā konferencē, kur uzastuoja ar prezentaceju “Regionalūs volūdu apgivis planuošona i efektivitatis nūviertiejums”.

Skaiti rokstu: “Profesors: padorit volūdu modernu, “sekseigu” i eipašu”