Atkuortuotai izdūta gruomota par prīsteri Vladislavu Litaunieku

Atkuortuotai izdūta gruomota par prīsteri Vladislavu Litaunieku

Rokstu sagataveja: lakuga.lv

Atkuortuotai izdūta gruomota “Priesteris un moceklis Vladislavs Litaunieks Kristus kviešu grauds” par prīsteri i mūcekli Vladislavu Litaunieku. Prīsters tyka nažieleigi speidzynuots i 1941. gods 24. junī nūšauts Daugovpiļs cītymā. Ir aizsuokts juo beatifikacejis process.

V. Litaunieks dzims 1909. gods 28. augustā Rēzeknis apriņča Bykovys pogosta Bernānu sādžā, beja vacuokais bārns Litaunīku saimē. Piec Nagļu pamatškolys beigšonys īsastuoja Aglyunys katuoļu gimnazejā i vāluok Reigys Goreiguo seminara sagataveišonys kursā. 1933. godā Svātuo Jākuba katedralē Vladislavs tyka ordināts par prīsteri. Jis tyka nūzeimāts par vikaru Rēzeknē, bet dreiž piec tam par prāvestu Jaunbornē, vāluok Spruktu draudzē, kur pabeidze dīvnoma ceļtnīceibu. Nu 1938. leidz 1941. godam beja Indrys draudzis prāvests. 1941. gods zīmā prīsteri puorcēle dorbā iz Vyškim. 1941. gods 23. martā jis devēs ar viļcīni iz Feimaņu draudzi paleidzēt tuos prāvestam nūvadeit gavieņa rekolekcejis. Čekys īriedni jam sekuoja i apcītynuoja viļcīnī, nūvede iz Daugovpiļs cītumu, kur nažieleigi mūceja.

1941. gods 21. junī  V. Litaunieku nūtīsuoja iz nuovi ar montys konfiskaceju par “vaļsts nūdeveibu” i “kontrrevolucionaru” darbeibu. Treis dīnys vāluok jū nūsuove i kūpā ar cytim nūgalynuotajim aproka cītuma pogolmā. Vāluok prīstera mirsteiguos atlīkys tyka puorapbedeitys Vyšķu bazneicys duorzā i pastateits pīmineklis. 1991. godā prīsters V. Litaunieks tyka reabilitāts. Niu nūteik juo beatifikacejis process. Beatifikaceja ir ceremoneja Rūmys katuoļu bazneicā, kurys laikā kaidu personu pasludynoj par svieteigu. Tei ir obligata pyrma kanonizacejis.

Gruomota “Priesteris un moceklis Vladislavs Litaunieks – Kristus kviešu grauds” pyrmū reizi tyka izdūta 2012. godā. Tymā publicāts V. Litaunieka dzeivisstuosts, apkūpuotys līceibys par sajimtū paleidzeibu caur juo aizbiļdnīceibu, atrūdama novenna juo gūdam – lyugšona, kas juoskaita devenis dīnys piec kuortys. Vairuokuos volūduos, ari latgaliski, ir izveiduota prīsteram veļteita sātyslopa oremus.lv. Tymā var skaiteit ari par juo beatifikacejis procesa aktualitatem.

Print Friendly, PDF & Email

Nūtikšonu kalendars

Oct
5
Tre
15:00 Pītera Korsaka fotografeju izstu... @ Latgolys Kulturviesturis muzejs
Pītera Korsaka fotografeju izstu... @ Latgolys Kulturviesturis muzejs
Oct 5 @ 15:00 – 16:30
Izstuode viestej par 20. i 21. godu symtā satyktajim zynomajim i mozuok zynomajim latgalīšim. Tei ir līceiba par laikabīdrim mynātajā periodā, kurūs vydā ir Pīters Zeile, Evalds Vasilevskis, Bronislava Martuževa, Juoņs Streičs, Bronislavs Spridzāns i[...]
Oct
7
Pīk
14:00 Antoninys Masiļūnis “Povuoru gru... @ Latgolys Kulturviesturis muzejs
Antoninys Masiļūnis “Povuoru gru... @ Latgolys Kulturviesturis muzejs
Oct 7 @ 14:00 – 15:30
Programā: 2022. godā atjaunuotuo izdavuma prezentaceja i stuostejums par 1992. godā izdūtuos A. Masiļūnis gruomotys “Povuoru gruomota” redizaina projektu i tuo realizaceju, prezentej – dizainere Valentīna Siņakova; Daleišonuos atmiņuos, pīsadola: 1992. goda izdavuma dizaina autore[...]