Roksta autors: portals lakuga.lv

Jau vairuokus godus apreļa beiguos nūteik dažaidi pasuokumi i aktivitatis Latgolys kongresa dīnys atzeimuošonai. Itys gods ir sovaižuoks, COVID-19 izplateibys deļ publiski pasuokumi i kūpeiga sviniešona izpalīk. Latgalīšu kulturys ziņu portals lakuga.lv aicynoj Latgolys kongresa dīnu, 27. apreli, svinēt digitalā formatā – sovai profila biļdei Facebook izlikt kaidu nu latgaliskūs rameišu.

27. apreļs ir viesturiskuo 1917. gods Latgolys latvīšu kongresa lāmumu pījimšonys datums. Šymā kongresā pījimtī lāmumi veidoj pamatu Latvejis vaļstei i Latvejis Satversmei. Vaira par kongresa nūzeimi i nūrisi var skaiteit rokstā “Latgolys kongress: pamatakmiņs Latvejis vaļsts izveidē”.

Nu 2018. gods 27. apreļs kai Latgolys kongresa dīna nūsaceita par atceris i atzeimojamū dīnu, tei īkļauta lykumā “Par svētku, atceres un atzīmējamām dienām”.

Portals lakuga.lv ir radejs vairuokus rameišus ar latgaliskim uzrokstim, kas paradzāti izlikšonai iz vītnis Facebook.com lītuotuoju profila biļdem. Taidā veidā sevkuram ir vareiba publiski paust sovu latgaliskū indetitati ci draudzeigū attīksmi pret latgalīšu volūdu, Latgolu i latgaliskū kulturu. Kūpumā izveiduotys sešys versejis, tūs dizainu veiduojuse Inese Krivmane.

“Napaseņ mes radejom digilatuos uzleimis sazinis aplikacejom “WhatsApp” i “Telegram” i gribējom turpynuot škārsteiklu padareit latgaliskuoku. Facebook.com ir vīns nu popularuokūs socialūs teiklu, kuru lītoj dažaida vacumu, interešu i dažaiduos pasauļa vītuos dzeivojūši latgalīši i latgaliskuos kulturys draugi. Niu, kod myusu dorba i socialuos dzeivis leluokuo daļa paīt škārsteiklā, aicynojam Facebook.com lītuotuojus Latgolys kongresa dīnu nūsvinēt digitalā formatā, izavielejūt pi sovys profila biļdis izlikt kaidu nu latgaliskūs rameišu. Cerim, ka myusu iniciativa gius atsauceibu,” soka idejis autore i portala lakuga.lv redaktore Vineta Vilcāne.

Lai profila biļdei izlyktu kaidu nu portala lakuga.lv radeitūs rameišu, juoveic itaidys darbeibys: juospīž “maineit profila biļdi”, tuoļuok “Pievienot rāmīti”, tuoļuok maklātuojā juoīroksta vuords “latgaliski” i sistema pīduovuos sešys versejis. Izavielej sev teikamuokū!