Tūp Kolupam veļteita kruosojamuo i biļžu gruomata

Tūp Kolupam veļteita kruosojamuo i biļžu gruomata

Roksta autors: Vineta Vilcāne, portals lakuga.lv

Muokslinīks Ēriks Grosbergs veidoj kruosojamū gruomotu, kurā kotram alfabetam burtam atlasejs i ilustriejs dažaidus latgalīšu vuordus, eipašu vītu īruodūt sovys dzymtuos pusis – Kolupa vuordim. Gruomota veiduota leidzeigā stilā kai juo pārņ topušuo lomu vuordu gruomota pīaugušajim “Spolvainuo mēle, vuordi ar stuoju”.

Radūšuos gaitys suoc ar avīžu apzeimiešonu

Zeimiešonai Ēriks Grosbergs pīsaviers jau bierneibā, vairuokys reizis nu ituos nūdarbis nūsaviers, tok vāluok pi tuos atsagrīzs. Ēriks ir apgivs muokslu pošvuiceibys ceļā, jam vysod bejuse cīši tyva radeišona, tū jis sasaista ar sovu vacuoku nūsadorbuošonu – tāvs bejs muzykants, bet muote šivieja.

“Maņ patyka zeimēt, izlikt sovys dūmys iz papeira. Munā bierneibā nabeja pīīmams cīši daudz papeira, bet zeimuli beja, i es apzeimieju vysys avīžu molys i baba beja nadaudz dusmeiga par tū,” atguodoj Ēriks. Vāluok Ēriks suoce nūsadorbuot ar grafiku i puorsvorā zeimēja automašynu i cytu transporta leidzekļu dizainus, sovukuort studeju godūs vaira pīsavērse gleznuošonai ar akrilu. “Tū dareju deļ savys prīcys i gleznys beja duovonys draugim. Kod saīt laiks, tod pasadorboju, niu asmu pīsavierss nūdarbem, kas saisteitys ar meditiešonu i jaunom muokslinīciskom īvierzem –  intuitivai zeimiešonai,” stuosta Ēriks, atzeimojūt, ka muokslys aktivitatis ir juo hobejs i tom otkon pīsavierss piec četru godu puortraukuma, daudz laika pajam saime i kasdīnys dorbs.

Sovus dorbus Ēriks roda i publicej zam vuorda “Gleznukalns”. Par tuo izceļsmi muokslinīks stuosta: “Muns uzvuords ir Grosbergs, kas  vuociski nūzeimoj “lels kolns”. Ar “Gleznukalns” es suoču pasaraksteit pyrms godim 10. Munim draugim tys patyka, jo beja skaneigs i daleji atbylda munam uzvuordam.’’

Dorbs pi gruomotys īsuokts pyrms vairuoku godu

Ēriks atsuocs aktivu dorbu pi jau seņ lūluotuos kruosojamuos gruomotys ar latgalīšu alfabetu. Pyrms četrim godim jis vītnē Facebook.com beja publiciejs tuo breiža gruomotys verseju, par kuru daži latgaliskuos kulturys aktivisti bejuši cīši kritiski, daudz kritikys bejs par pareizraksteibu. Tod jis projektu atlyka.

“Klaidys pīļaun vysi, nabeju vysu leidz golam izpietejs. Es beju taisejs tai kai munā, Kolupa, pusē runoj, kulturys cylvākim nabeja teikamai iz tū vērtīs. Gribieju izlobuot, meklieju cylvākus, kas varātu paleidzēt. Pīkryta labuot, bet nagribēja byut par “oficialū” redaktoru. Tai es saprotu, ka latgalīši sovu volūdu uztver cīši nūpītnai. Kai atbiļdi tam vysam es sataiseju lomuvuordu gruomateņu, lai nabyutu puoruok nūpītni,” par sovu pīredzi stuosta Ēriks.

Niu jis pats, izmontojūt dažaidus resursus, veic gruomotā īkļautūs vuordu redigiešonu i pīloboj ilustracejis, atzeistūt, ka nav nimoz tik vīgli izdūmuot, kaidus vuordus attāluot, lai byutu teikamai vērtīs. Golvonais  vizualais redaktors jam beja saime. Ēriks atzeimoj, ka juo veikums nav juouztver kai vuiceibu leidzeklis latgalīšu volūdys apgivei, bet gon kai muokslinīka radūšuo izpausme. Gruomota dūmuota pīaugušajim, kurā autors grib īmyužynuot Kolupa pusis vuordus. Eipaši Ēriks izceļ vuordu Untuons, tai Kolupa pusē saucūt Ontonu, i taida vuorda verseja asūt sastūpama tikai tī.

“Jauneibys godu laikā es zeimieju karikaturys i beju personaliziejs Untuonu savā muokslā, grybu ari sataiseit gruomotu komiksu stilā, kas stuosteitu par itū personažu, par juo dorbim i nadorbim, par ceļu, kū guojs i kū grib pasaceit, komiks ruodeis juo goreigū ceļuojumu,” par nuokūtnis īcerem stuosta Ēriks.

Ēriks struodoj ari pi dažaidim projektim, kas nav saisteiti ar latgalīšu volūdu. Jam var sekot leidza gon Instagram, gon Facebook, kai ari apmeklēt sātyslopu.

Ar sovu veikumu muokslinīks grib īdvasmuot leidzcylvākus i mudynuot jūs dūmuot plašuok i pozitivuok, paplašynuot apziņu i maineit vidi ap sevi, pasavērt iz vysu nu cytys perspektivys. “Es grybātu sovā muokslā vairuok īkļaut tū, kū asmu izzynuojs par sovim vystymsuokajim kambarim, dvēseli, ceļuojumu itamā saulē. Mes dzeivojam nimoz naapsazynojūt, kaids ir myusu potencials i kū mes sovā dzeivē varim izdareit deļ seve i cytu. Radeit koč kū jaunu, pasasmīt par savom i vuiceitīs nu cytu klaidom i par vysu vysvaira meiļuot sovu saimi,” tai Ēriks.

Print Friendly, PDF & Email