Filma “Latgalīši Sibirī” nūsaverama ar subtitrim angļu volūdā
Rokstu sagataveja: portals lakuga.lv
Dokumentaluo filma “Latgalīši Sibirī” stuosta par latgalīšim tuolajūs Sibira plašumūs, kuru seņči iz tīni nu Latgolys devēs peļņā, vāluok daudzi, tī dabuojuši zemi, palyka iz dzeivi. Jūs piecnuocieji vēļ ir saglobuojuši latgaliskuos tradicejis i volūdu. Niu filma nūsaverama ar subtitrim angļu volūdā.
2019. gods vosorā fiļmiešonys grupa devēs divu nedeļu ilgā ekspedicejā iz Krīveju, Sibiri, kab tyktūs ar latgalīšim, kas tī dzeivoj jau trešajā paaudzē, zyna vēļ latgalīšu volūdu i pīkūpj latgaliskuos tradicejis. Tyka satykti ari latgalīši, kuru saimis lūcekļus nu Latvejis deportēja padūmu vara. Sastoptūs latgalīšu saimu stuosti ir nūsaverami dokumentajā filmā “Latgalīši Sibirī”.
Filma atkluoj interesantus faktus par latgalīšu izceļuošonu i latgaliskū kulturu Sibirī, pīdzeivuotajom represejom. Filmā var vaira izzynuot, pīmāram, par Moskovys izdevnīceibā “Prometejs” latgaliski izdūtū Daniela Defo romanu “Robinsons Kruzo”, pabyut dzeraunē Mihailovka, kur izsyutejumā dzeivuoja i nūmira latgalīšu politiks, rakstnīks i sabīdryskais darbinīks Fraņcs Kemps. Sibirīšu i kinys veiduotuoja Arņa Slobožanina stuostus papyldynuos ekspertu komentari.
