Aicynoj dasasaceit Latgolys “Ceļamaizes” stipendejai

Aicynoj dasasaceit Latgolys “Ceļamaizes” stipendejai

Rokstu sagataveja: portals lakuga.lv

Ari itymā godā Amerikys latvīts, mecenats Pīters Aloizs Ragaušs atbaļsteis talanteiguokūs i aktivuokūs Latgolys jaunīšus, kuri suoks pamatstudejis Latvejis Universitatē (LU), tai ryupejūtīs par nūvoda jaunīšu izaugsmi ilgtermeņā. Sadarbeibā ar LU fondu dasasaceišona stipendejai nūtiks tīšsaistē da 16. augusta, portalu lakuga.lv informej fonda puorstuove Brigita Zutere.

Izcileibys stipendeja Latgales “Ceļamaize” paradzāta ceņteigim, vuiceibuos spiejeigim i sabīdryskā dzeivē aktivim LU 1. kursa studentim, kuru saknis rūnamys Latgolā. Konkursa kuorteibā atbolstu 2 200 eiro apmārā varēs sajimt div vydsškolu beidzieji. Pārņ pyrmuos div stipendejis sajēme Jeļizaveta Klimanova nu Viļānu i Toni Anželo Fernandes nu Kaunatys.

“Stipendejis dabuošona ir vēļ vīns daruodejums tam, ka tovs īguļdeitais laiks, energeja i ryupis teik nūvārtātys. Tys sovā ziņā ir stimuls napasadūt i turpynuot sasnēgt augstuokys viersyunis. Pyrmkuort, es studentim īsaceitu izmontuot vysys īspiejis, kū jim dūd universitate. Ūtrkuort, stipendejis dabuošona stimulej turpynuot tikpat efektivi i ražeigi struoduot, lai sasnāgtu voi nūspraustu jaunus mierķus,” tai īdrūsynoj Toni Anželo Fernandes, 2019./2020. akademiskuo gods stipendejis īgiviejs.

Dasasaceišonys nūsacejumi.
Vysim pretendentim dasacejumi juoīsnādz tīšsaistē da 2020. gods 16. augusta 23.59 stuņžu:
• elektroniska veidlopa www.fonds.lv;
• div rekomendacejis viestulis – nu školuotuoju, direktoru, uorpusškolys nūdarbeibu vadeituoju i c.;
• CV (Europass formā);
• līceiba i atestats par vyspuorejū videjū izgleiteibu;
• centralizātūs eksamenu (CE) rezultati;
• izziņa par sovu voi vacuoku deklarātū dzeivisvītu;
• eseja breivā formā par mecenatu, kuram grybātu leidzynuotīs;
• cyti dokumenti – vērtīs pi stipendejis dasacejuma.

Stipendejis ir nūzeimeigs finansialais atbolsts vuiceibu procesā, juos veicynoj izaugsmi i izcileibu. Tū aplīcynoj ari pats mecenats, Latgolys patriots Pīters A. Ragaušs, kurs devs boguoteigu īguļdejumu latvīšu, jo eipaši latgalīšu kulturys saglobuošonā i populariziešonā. Jis ir Latvejis gūda konsuls Teksasā, ASV, kai ari vīns nu jaunuokūs LU fonda partnerorganizacejis “Friends of the University of Latvia” vaļdis lūcekļu.

Vēļ tūpūšī Latvejis Universitatis studenti da 16. augusta var dasasaceit ari LU fonda puorvaļdeitajai izcileibys stipendejai “Ceļamaize” i socialuo atbolsta M.M.V. Petkevičs piemiņas stipendijai. Suocūt ar pamatstudeju 2. kursu, studentim daīmamūs stipendeju skaits pasaplašynoj. Centralizāta dasasaceišona nūtiks LU fonda škārsteikla vītnē nu 7. da 30. septembra. Pretendenti aicynuoti laikus izpieteit stipendeju nūsacejumus i naatlikt dasasaceišonu iz pādejū šaļti.

Print Friendly, PDF & Email

Nūtikšonu kalendars