Voi latgalīšu portalam lakuga.lv byus juopuortrauc dorbuotīs?

Voi latgalīšu portalam lakuga.lv byus juopuortrauc dorbuotīs?

Roksta autore: Vineta Vilcāne, portala lakuga.lv redaktore

Juņa ūtrajā pusē Latgalīšu kulturys ziņu portals lakuga.lv sajēme skumeigu viesti – Vaļsts Kulturkapitala fonds nūraideja projektu portala darbeibys nūdrūsynuošonai. Finansialuo atbolsta nasajimšona nūzeimoj, ka portals lakuga.lv nu rudiņa navarēs dorbuotīs pylnvierteigi i vysdreižuok piļneiga darbeiba byus juopuortrauc ar 2021. gods janvari.

Portalu lakuga.lv 2007. godā izveiduoja bīdreiba “Latgolys Studentu centrs”, nu breivpruoteigi uzturātys sātyslopys tys itūs godu laikā ir palics par kvalitativu medeju, par sova veida Latgolys vizeitkarti. Lakuga.lv ir nanūviertejama nūzeime latgalīšu volūdys saglobuošonys i atteisteišonys procesā, tymā skaitā volūdys prestiža ceļšonā – tys ir vīneigais medejs pasaulī, kura saturs ir tikai latgalīšu rokstu volūdā. Eiropā reši kurā regionalajā, mozuoklītuotajā volūdā ir pastuoveigi saturu rodūšs rakstisks medejs. Bet izaver, ka latgalīši sovu “privilegeju” tyvuokūs mienešu laikā zaudēs…

Latgalīšu portala lakuga.lv saturs vysod ir bejs daīmams bez moksys. Kab panuoktu regulara, vierteiga i interesanta satura izveidi, portala darbeibys nūdrūsynuošonai ir tics pīsaisteits projektu finansiejums.

Portala asameiba ir vīna nu nadaudzūs latgaliskūs aktivitašu, kas paleidz dzeivē eistynuot Latvejis Republikys Vaļsts volūdys lykumā izsaceitū apsajimšonu – saglobuot, aizsorguot i atteisteit latgalīšu rokstu volūdu. Par tū ir piļneigi pošsaprūtami, ka portala darbeibu caur dažaidom kulturys i medeju programom atbolsta nu vaļsts budžeta leidzekļu. Da šam finansiejumu ir daškiers Vaļsts Kulturkapitala fonds (VKKF), finansiejums sajimts ari kasgadejūs Latgolys kulturys programu ītvorūs, kai ari nu Latvejis Medeju fonda.

Itūs godu laikā ir tukyši pīraksteiti naskaitomi projekti, pa vairuokim kotru godu, jo finansiejumu nikod nav bejs īspiejms sajimt ilguokam laika periodam, pīmāram, 12 mienešim.

Kasgods finansiejums ir tics “sakaseits” nu vysaidu projektu, i tys nikaidā veidā nav ļuovs pylnvierteigi i tuolredzeigi plānuot portala dorbu i pīsaisteit jaunus cylvākus komandā.

Sovdabeiguos kulturys finansiešonys politikys deļ VKKF konkursūs nikod nav sajimts vyss projektūs praseitais finansiejums. Kab portals pastuovātu, voi nu ir tics samazynuots projekta eistynuošonys termeņš (kas nūzeimoj – mudruok juoteik pi nuokušuo projekta atbolsta) ci portala saturā īsaisteitī ir sajāmuši mozuokys atleidzeibys na kai suokūtnieji plānuots. Leidzeigi ar Latgolys kulturys programu. Turkluot portala satura veiduotuojim nav bejs nikaidu socialūs garanteju, pīmāram, lakuga.lv 13 pastuoviešonys godu laikā nikod nivīns darbinīks nav bejs atvalinuojumā. Voi vēļ kurā medejā ir tai bejs?

Itaida situaceja ir veiduojusēs aiz tuo, ka tics optimizāts daīmamais finansiejums. Kab samazynuotu portala izmoksys i ar daīmamū finansiejumu varātu piec īspiejis ilguokā laika periodā nūdrūsynuot portala dorbu, ar īsaisteitū personalu ir tykuši slāgti autoratleidzeibu i uzjāmuma leigumi, na dorba leigumi. Dorba leigumi i attīceigais nūdūkļu režims portala izmoksys palīlynuotu teju div reizis. Bet tys nanūzeimoj, ka portala darbeibys nūdrūsynuošonai tiktu daškierts attīceigi vaira finansiejuma.

Lakuga.lv dorbam nūzeimeigs atspaids bejs ari Medeju Atbolsta fonda finansiejums, tok tys ir bejs daīmams viņ dažus mienešus godā.

Mes cīši nūviertejam da šam snāgtū atbolstu, bez tuo nikai lakuga.lv nabyutu variejuse dorbuotīs tik daudzus godus. Tok aiz kotra roksta stuov reali cylvāki ar sovom kasdīnys vajadzeibom, jī taipoš kai cytūs medejūs i jūmuos struoduojūšī ir peļnejuši, kab jūs dorbs tyktu adekvati nūvārtāts i jim byutu skaidreiba par sovu dorba vītu ilgtermeņā. Turkluot, lai varātu struoduot lakuga.lv, ir napīcīšamys specifiskys – izcylys latgalīšu rokstu volūdys – zynuošonys. Taidys ir viņ dažim, teju iz vīnys rūkys pierkstim saskaitomim cylvākim, i jī ir zalta vērtē, partū ir eipaši svareigi jūs nuturēt portala komandā.

2020. gods pyrmūs četrus mienešus lakuga.lv dorbuojuos ar VKKF atbolstu, finansiejums tyka sajimts 2019. gods 3. projektu konkursā.

Projekts VKKF tyka snāgts ari ituo gods obejūs konkursūs. Pyrmajā reizē tys tyka nūraideits ar pamatuojumu, ka projekta dasacejums ir mozuok aktuals cytu konkursā īsnāgtū projektu dasacejumu kontekstā, ūtrajā – projekts jau ir atbaļsteits VKKF finansialūs īspieju rūbežūs.

Itūšaļt lakuga.lv dorbojās ar finansiejumu, kas tyka sajimts 2020. gods Latgolys kulturys programā. Tys tyka praseits darbeibys nūdrūsynuošonai da gods beigu, tok natyka daškierts pylnā apjūmā. Ar daškiertajim leidzeklim portala darbeiba teik nūdrūsynuota leidz septembra beigu, i tyka carāts atlykušajim ituo gods mienešim i 2021. gods suokumam tū īgiut VKKF konkursā. Tok cereibys napīsapiļdeja.

Atseviškys publikacejis itūšaļt teik sagatveitys Regionalūs i vītejūs medeju atbolsta programys ītvorūs. Ir zynoms, ka nu oktobra da gods beigu ik mienesi lakuga.lv varēs skaiteit viņ sešus, septeņus rokstus, kuri tiks sagataveiti itymā programā. Nikū vaira itys projekts naparedz i finansiejuma vaira rokstim nav.

Par lakuga.lv tuoļuokū darbeibu nav nikaidys skaidreibys. Ka natiks rosts rysynuojums, lakuga.lv darbeiba piļneibā byus juopuotrauc ar 2021. gods 1. janvari.

Itūs godu laikā lakuga.lv ir tics īguļdeits daudz breivpruoteiguo dorba, ik pa laikam ir bejuši bezfinansiejuma mieneši, tok tys ir turpynuojs raksteit. Vys tik entuziasms nav bezgaleigs.

Nui, portals ir svareigs kotram, kas tymā dorbojās, ka tys nabyutu sirdsdorbs, tod lakuga.lv dorbs byutu apsastuojs jau pyrms daudzu godu. Latgaliski rokstūšs medejs ir svareigs ci byutu juobyun svareigam vysai latgalīšu kūpīnai, Latvejis kulturtelpai, i na tikai Latvejis, bet Eiropys i pasauļa. Itūšaļt Latvejis vaļsts ir pasacejuse, ka naradz vajadzeibys piec latgaliski i latgalisku saturu rodūša kulturys medeja…

Nu sovys pusis mes asam izmontuojuši vysys daīmamuos īspiejis projektu konkursu finansiejuma pīsaistei. Ka kaidam ir redziejums i konkretys idejis, kai nūdrūsynuot latgalīšu portala lakuga.lv dorbu nuokūtnē, asam īinteresāti juos uzklauseit.

Itys ir emocionals breids, kod juoapsazynoj, ka var izabeigt tys, kamā ir īguļdeits tik daudz dorba, laika, ideju i degsmis. Bet ir ari teicīņs – kab suoktūs koč kas jauns, koč kam ir juosabeidz. Varbyut latgaliskajai kulturai ir vajadzeigs restarts i lakuga.lv ir pyrmais pīturys punkts itymā puormaiņu ceļā.

Print Friendly, PDF & Email

Nūtikšonu kalendars