Rokstu sagataveja: portals lakuga.lv

24. julī Krustpiļs nūvoda Atašīnē prezentēs folklorys teiciejai, latvyskūs tradiceju saglobuotuojai i pedagogei Valentīnai Mičulei veļteitu gruomotu. Gruomotys “Valentīna Mičule. Pa folkloras gaišo ceļu” autore ir Ināra Mihaloviča.

Valentīna Mičule myužeibā nūguoja 2015. godā, lelu daļu sova myuža jei beja veļtejuse tradicionaluos kulturys, folklorys i latvyskūs vierteibu saglobuošonai i nūdūšonai jaunajai paaudzei, kai ari pedagogis dorbam.

1981. godā Atašīnis vydsškolā V. Mičule izveiduoja jaunīšu folklorys kūpu, bet 1985. godā Atašīnis kulturys nomā dybynuoja folklorys kūpu “Vīraksne”. Juos veikums nūvārtāts ar vairuokom bolvom, tymā skaitā Latgalīšu kulturys goda bolvu “Boņuks 2012”.

Gruomotys aprokstā Atašīnis pogosta puorvaļdis vadeituoja Ilona Zalāne nūruodejuse, ka pogostā daudzi senejī svātki sasaglobuojuši, pasasokūt taišni V. Mičulei.

Gruomota “Valentīna Mičule. Pa folkloras gaišo ceļu” dīnys gaismu īraudzeja jau ituo gods pavasarī, tok tuos prezentaceja pandemejis deļ aizakavēja. Gruomotys attaiseišonys svātki nūtiks 24. julī, kas ir ari V. Mičules dzimšonys dīna. Prezentacejis suokums 19.00 stuņdēs Atašīnis pogosta kulturys nomā “Annas sāta”, tymā varēs satikt gruomotys autori Ināru Mihaloviču i apguoda “Jumava” puorstuovjus. Apmaklātuoji varēs baudeit ari folklorys kūpu sasadzīduošonu.

Gruomotā apkūpuots i izpieteits plošs materials – gon pošys Valentīnys Mičulis plošuok nazynomuos pīzeimis par sovu dzeivis guojumu “Vienas dzimtas stāsts”, juos veiduotais, folklorai veļteitais treisdaļeigais izdavums “Rītava”, kurā V. Mičule apkūpuojuse Atašīnis i cytūs Latgolys apleicīnis pogostūs savuoktuos tautysdzīsmis, dejis, rūtalis, godskuortu īražu tradicejis, publikacejis izdavumūs “Brīvā Daugava”, “Latvijas Avīze”, “Atašienes Vēstis” i c. Gruomotys tapšonā izmontuoti ari nūvodpietnīceibys materialu apkūpuojumi, folklorys kūpys “Vīraksne” dalinīku atminis, dīnysgruomotys i fotoarhivi. “Nu daīmamuo materiala raudzeju atlaseit i izceļt tū, kas spylgtai paruoda Valentīnys dzeivis ceļu i dorba myužu,” intervejā žurnalistam Juoņam Apīņam atkluoj gruomotys autore Ināra Mihaloviča.