Rokstu sagataveja: portals lakuga.lv

Latvejis Nacionalais kulturys centrs izdevs gruomotu “Dienvidlatgalē austās segas”, kurys autore ir Latvejis Etnografiskuo breivdobys muzeja Kruojumu nūdalis vadeituoja, muokslys viesturneica Daina Kraukle. Gruomotys attaisiešonys svātki nūtiks 5. septembrī 12.00 stuņdēs Latvejis Etnografiskajā breivdobys muzejā, Reigā, Breivdobys īlā 21. Pasuokuma laikā interesentim byus īspieja gruomotu īsaguoduot, viestej Latvejis Nacionaluo kulturys centra sātys lopa.

Daina Kraukle izdavuma īvodā roksta: “Leidz šam Latvejis dīnvydu pīrūbežys nūvodu amatnīku veikums ir moz pieteits. Etniski boguoteigais īdzeivuotuoju sastuovs, kai ari cīšī kontakti ar Boltkrīveju ir veiduojuši viņ itai pusei soveigu izpratni par skaistū, kas amatnīceibā puorsteidz ar boguoteigim rūtuojumim i spūdru, dzeivisprīceigu kruosu zīdu. Pietejuma pamatā ir deču kolekceja (204 deči), kas 2003. godā beja eksponāta Kruoslovā. 2015. godā Latvejis Etnografiskais breivdobys muzejs reikuoja ekspediceju, kurys laikā izvaicuoju audiejis par izmontuotajim dorbareikim, materialim, audumu tehnikom i c. Īspieja tiktīs ar audiejom ir nanūviertejama, partū ļaun īraudzeit i dziļuok saprast gon vidi, gon dorba pajiemīņus, gon pošu muojamatnīču dvēseli. Maņ Latgola vysod lykusīs kai Latvejis energejis i vitalitatis olūts. Caru, ka gruomotā apkūpuotais ļaus audieju nuokušajom paaudzem smeļtīs īdvesmi i radeit jaunus interesantus dorbus.”

Kataloga pamatā ir div golvonī olūti: lītyskī, kuru leluokuo daļa atsarūn privatajūs kruojumūs, bet jūs attāli – Latvejis Etnografiskuo breivdobys muzeja zynuotniskajā arhivā, i raksteitī, kur golvonuo informaceja dabuota nu teicieju tekstu, partū ka kolekcejis prīkšmati puorsvorā topuši 20. godu symta ūtramā pusē. Rakstureigi, ka vēļ 20. godu symta pyrmajā pusē deči austi voi sevkurā sātā, bet itūšaļt, 21. godu symta pyrmajā pusē, puorsvorā var sastapt viņ godūs cīnejamys audiejis, kas vaira naturpynoj sovys prasmis tradicionalā veidā (puormontojūt saimē) nūdūt tuoļuok jaunuokajom paaudzem.

Kolekceju veidoj deči, kas darynuoti Aulejis, Ezernīku, Indrys, Izvolta, Kombuļu, Osyuna, Rūbežnīku, Skaistyas, Svareņu, Škaunis i Škeļtovys pogostūs.

Daina Kraukle nu 1985. gods struodoj Latvejis Etnografiskajā breivdobys muzejā i itūšaļt ir Kruojumu nūdalis vadeituoja. Beiguse Emīla Dārziņa muzykys vydsškolu (1977), kai ari Latvejis Muokslys akademeju (1985) Muokslys viesturis i teorejis specialitatē. Nu 1985. leidz 2015. godam ir vīna nu Latvejis Etnografiskuo breivdobys muzeja godatiergu reikuotuojom, par kū 2005. godā sajāmuse Lelo folklorys gods bolvu, 2006. godā itei bolva pīškierta ūtrreiz kai daudzu izstuožu autorei i īkuortuotuojai. D. Kraukle ir pīcu gruomotu par ornamentu i pīcu gruomotu par godatiergim Latvejā autore. Gruomotys par ornamentu tulkuotys angļu i kīnīšu volūdā.

Itūšaļt gruomotu varams īsaguoduot Latvejis Nacionalajā kulturys centrā (Piļs laukumā 4, Reigā, 3. stuovā) pyrmūdīnēs, ūtardīnēs i trešdīnēs nu pļkst. 9.00 leidz 17.00. Izdavuma cena LNKC birojā – 20 eiro.