Roksta autors: bīdreiba “LgSC”

Bīdreiba “LgSC” gatavej izdūšonai Sandrys Ūdris stuostu kruojumu “Tīsys syla bolsi”, kurs aizdūd vaicuojumus par “pareizajom” dzeivis izvēlem i vierteibom. Viņ parkū “pareizais” bīži īvad bezizejis situacejuos kai cītumā?

Visvaira nu vysaida veida vardarbeibys cīš sīvītis voi vīnkuorši nav laimeigys, bet gribiejušys i cantušuos piec lobuokuo, a vyssuopeiguok tū puordzeivoj – bārni. Itūs stuostu varūnis i varūņus vīnoj pasadūšona vardarbeibai, sevis kai augstuokuos dzeivis vierteibys nūnycynuošona, bet daudzys stuostūs atkluotuos situacejis ir paaudzēs veidojušūs stereotipu atsakuortuošona. Lai itī teksti ir pamudynuojums sevkuram, kam napīcīšams, apjaust i psihologiski izīt nu sova napateikamūs situaceju i sajiutu “Tīsys syla”.

Gruomotys redaktore ir Ilze Sperga, a izdavuma muokslinīciskū dizainu veidoj Māris Justs. Juo filozofiski dziļuos fotografikys papyldynoj tekstus i rūsynoj tāluotū uztvert vairuokūs leimiņūs – psihologiski, mitologiski, kulturtelpiski, puorlaiceiguos atkluosmēs voi vīnkuorši realistiski. Partū ka izejis punkts Tīsys syla tālam ir reala vīta Baļtinovys pogostā.

Diveji kruojuma stuosti jau ir tykuši publicāti portalā lakuga.lv – “Unuks” i “Abigailys spīgeļs”. Sandra Ūdre sevi latgalīšu literaturā pīsacejuse kai leidzautore romanam “Aizlauztais spaits” (2016). Jei ir dzymuse 1974. godā Rēzeknē, Rēzeknis Augstškolā, niule RTA, īgivuse magistra grādu filologejā, juos profesionaluo darbeiba da ituo bjuse saisteita ar latgaliskuo kūpšonu – korektore i redaktore Latgolys Kulturys centra izdevnīceibā, zynuotniskuo asistente Rēzeknis Augstškolā, kur pietejuse latgalīšu leksiku, kulturys žurnaliste, kurys publikacejis skaitomys portalā lakuga.lv i žurnalā “A12”, itūgod ari “konTEKSTS”.

Gruomota sagatavuota, pasasokūt Latgolys regiona atteisteibys agenturys, a/s “Latvejis vaļsts meži” i Vaļsts kulturkapitala fonda atbolstam.