Izguojs jauns Valentina Lukaševiča dzejis kruojums “Pādi navā svāti”

Izguojs jauns Valentina Lukaševiča dzejis kruojums “Pādi navā svāti”

Roksta autors: Kristīne Pokratniece

Izguojs rakstnīka i literaturzynuotnīka Valentina Lukaševiča dzejis kruojums latgalīšu volūdā “Pādi navā svāti”. Tys nūslādz jau 2005. godā aizsuoktū tetralogeju “Ceļš”.

Kruojums “Pādi navā svāti” ir laikmeteiga, sadzeiviskū i metafiziskū sintezejūša dzeja, kurā, kai pīzeist pats autors, jis ir celinīks, kurš apsarunoj gon ar tim, kas brauc garum, gon ar tim, kas siež pīturā, jis daudz vāroj, bet cytu reizi vīnkuorši paskrīņ vysim garum. Taipat kai da šam, ari itymā kruojumā ir 108 dzejūli. Tetralogeju “Ceļš” 2005. godā aizsuoka dzejis kruojums “Kuozynda”, tai 2006. godā sekuoja “Vot taidi vot i batvini”, bet 2011. godā “Bolti burti”. Par kruojumu “Bolti burti” autoram daškierta Latvejis Literaturys goda bolva – “Speciālbalva –  īpaši notikumi latviešu rakstniecībā 2011”.

Gruomotys redaktore Iļze Sperga: “Šaļtim ruodīs — par eisu i nazkas palyka napasaceits, niu juodasoka maņ pošai, skaiteituojam. Taida ite boltuo gruomota, kurā autors ar vīglim trīpīnim i puors vuordim zeimej malnboltys ilustracejis, a maņ pošai juodalīk kruosys, kab vyss atsadzeivuotu. A varbyut tī ir aforismi. A varbyut stuosti par dzeivi i ceļu. A varbyut paņteni deļ apsveikuma kartenis.”

Gruomota sagatavuota, pasasokūt Latgolys regiona atteisteibys agenturys, A/S “Latvejis vaļsts meži” i Vaļsts kulturkapitala fonda atbolstam.

Izdeviejs SIA „Cymuss”, projekta vadeituoja Kristīne Pokratniece, maketa autore – Inese Krivmane.

Gruomotu var vaicuot latgalīšu gruomotu internetveikalā taiseitslatgola.lv, Daugovpilī – veikalā “o!Marta”, Rēzeknē – gruomotneicuos “Liesma” i “Zvaigzne ABC”, kai ari gruomotu veikalūs “Jānis Roze” vysā Latvejā.

Print Friendly, PDF & Email

Nūtikšonu kalendars

Apr
14
Tre
12:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
Apr 14 @ 12:00 – May 8 @ 18:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv