Izguojuse Annelis Slišānis gruomota “Tuoraga stuosti”

Izguojuse Annelis Slišānis gruomota “Tuoraga stuosti”

Roksta autore: Ilze Sperga

Izguojuse tekstilmuokslineicys i konkursa „Latgolys prozys skaitejumi 2020” laureatis rakstneicys Annelis Slišānis gruomota “Tuoraga stuosti”. Jaunajā gruomotā kūpā salykti treispadsmit eisī stuosti par bīzpīnu, reizē  par sīvītem myusu dīnu sabīdreibā. Kūpā jī veidoj vīnuotu viestejumu par sīvītis ceļu pi seve, pi sovys byuteibys.

Stuostu kruojums “Tuoraga stuosti” izdūts autoris dzymtajā Upītis pusis izlūksnē, īvārojūt myusu dīnu pareizraksteibys normys. Gruomotys redaktore Ilze Sperga soka: “Taišni itaida volūdys izvēle ļaun vysu lobuok sajust teksta varūnis naaizsorguoteibu saskarē ar uorpasauli, partū ka dzymtuo muotis i tāva volūda atsadz pošys dziļuokuos pateibys kuortys i intimū ceļu pi seve. Tī ir stuosti par sīvītis pīaugšonu i puortapšonu, par ceļu cauri vardarbeibai, par seve mekliejumim. Deļtuo volūda ir byutiskys izteiksmis leidzeklis, kas zynuotuojam i jiuteigam skaiteituojam attaisa jaunus teksta sajiutu atslāgus.”

Stuostu kruojuma autore A. Slišāne par sovu veikumu: “Tuoraga stuosti ir par variešonu, par cilvāka izaugšonu, par izaugšonu i byušonu par sīvīti. Par byušonu par cilvāku, tuodi stuosti tī ir.

Tuorags kuo metamorfoze, kuo puortapšona. Kuo tuoda materija, kas caur saskuobšonu i korstumu palīk par jaunu i lobu vīlu.”

A. Slišāne beja lobuokuo literarūs prozys tekstu konkursā „Latgolas prozys skaitejumi 2020” i pīsadaleja storptautyskajā literaturys festivalā “Prozas lasījumi 2020”, skaitūt ari itymā kruojumā nūdrukuotūs stuostu kūpu: “Tuoraga kule”, “Ai tuoraga tortu gostūs” i “Vilcīnā”. Skaitejumu žurejis lūcekle rakstneica Laima Kota par itū gruomatu soka tai: “Na vysur Latgolā bīzpīnu sauc par tuoragu. Bīzpīns, sipisnīks, boltpīns, kupušnīks ir dzierdāti, bet tuorags nūskaņ kai tuaregs-beduins, koč kas ni dzierdāts, ni saprūtams. Tok vyss, kas romanā salykts ap tuoragu — Annelis Slišānis muotis i tāva volūdā apraksteits tik pazeistams, ka elpu aizraun. Tik pazeistama ruodīs socialuo ainova, kur darbojās senejī pretejuo krosta lykumi — soki par skaistū švakus vuordus, tod labi byus, sit — tod gan jau gūdoj, saklīdz iz bārna — i tys nūzeimēs, ka savejuo eistineibā ak jau mīļoj, bet mīlesteibu izruodeit nav pījimts…”

A. Slišānes īprīkšejuo gruomota i tekstilmuokslys projekts “#100dečiLatvijai” ir duovona Latvejis 100. dzimšonys dīnā. Symtgadeigūs stuolūs Latgolā i Reigā nūaustī deči tyka izstuodeiti daudzejuos vītuos Latvejā i pīsaisteja viereibu ar dzili personeigajā pīredzē sakņuotim i aužūt pīraksteitim stuostim, kas kūpā salykti gruomotā. 2017. i 2018. godā autore par tekstilmuokslys i literaturys projektu “#100dečiLatvijai” ir īgivuse latgalīšu kulturys goda bolvu “Boņuks”.

Gruomatys “Tuoraga stuosti” izdeviejs ir SIA “Anneles zeme”. Gruomatys izdūšonu atbolsta “Latvijas valsts mežu” i Vaļsts Kulturkapitala fonda atbaļsteituo “Latgales kultūras programma 2020”, kū koordinej Latgolys Regionaluos atteisteibys agentura.

Print Friendly, PDF & Email