Izguojs Sandrys Ūdris stuostu kruojums “Tīsys syla bolsi”

Izguojs Sandrys Ūdris stuostu kruojums “Tīsys syla bolsi”

Rokstu sagatveja: portals lakuga.lv

Bīdreiba “LgSC” izdavuse literatis i kulturys žurnalistis Sandrys Ūdris stuostu kruojumu “Tīsys syla bolsi”. Tys aizdūd vaicuojumus par psihologiski gryutom attīceibom saimē, “pareizom” dzeivis izvēlem i vierteibom.

Sandrys Ūdris gruomotā “Tīsys syla bolsi” publicātī stuosti aptver vysaidus laikus i cylvākus, tok jūs vīnoj izmysuma voi vardarbeibys situacejis. Daudzys nu jūs atsakluoj kai latgalīšim pazeistamu, paaudzēs veidojušūs stereotipu atsakuortuošona. Tīsys syls ir reala vīta Baļtinovys nūvodā ar legendu par tū, ka tī Puncuļovys piļskolna vaļdinīks struopiejs ļauds, īrūkūt jūs da pusis dzeivus zemē – izdzeivuojs ci naizdzeivuojs. “Gruomotā Tīsys syls juosaprūt kai metafora. Partū lai itī teksti ir pamudynuojums sevkuram, kam napīcīšams, apjaust i psihologiski izīt nu sova napateikamūs situaceju i sajiutu “Tīsys syla”,” soka stuostu autore.

Ite ir jau ūtruo Sandrys Ūdris gruomota, 2016. godā izguoja kūpa ar Juoni Ryučānu pīraksteitais romans “Aizlauztais spaits: Franča Kempa dzeivis atspīdynuojumi”.

Sandra Ūdre ir īgivuse magistra gradu filologejā Rēzeknis Augstškolā, juos profesionaluo darbeiba ir saisteita ar latgaliskuo kūpšonu – bejuse korektore i redaktore Latgolys Kulturys centra izdevnīceibā, zynuotniskuo asistente Rēzeknis Augstškolā, kur pietejuse latgalīšu leksiku. Niu struodoj kai kulturys žurnaliste, S. Ūdris publikacejis skaitomys Latgalīšu kulturys ziņu portalā lakuga.lv, žurnalūs “A12” i “konTEKSTS”.

Gruomotu “Tīsys syla bolsi” bīdreiba “LgSC” izdavuse, pasasokūt Latgolys regiona atteisteibys agenturys, a/s “Latvijas Valsts meži” i Vaļsts kulturkapitala fonda atbolstam. Izdavuma muokslinīciskū dizainu veiduojs Māris Justs, tekstu ilustrativi papyldynoj juo filozofiski dziļuos fotografikys. Gruomotys redaktore ir Ilze Sperga, korektore – Muora Mortuzāne-Muravska. Stuostu kruojums nūpierkams Rēzeknē gruomotu veikalā “Liesma” i “Zvaigznes grāmatnīca”, Daugovpilī – veikalā “O!Marta”, kai ari škārsteikla veikalā taiseitslatgola.lv, tyvuokajā laikā byus atrūnams ari gruomatneicuos “Jānis Roze”. Publiskajom i vuiceibu īstuožu bibliotekom ir īspieja gruomotu dabuot duovynuojumā. Biblioteku puorstuovjim lyugums raksteit iz e-postu sandraiudrei@inbox.lv

Print Friendly, PDF & Email

Nūtikšonu kalendars

Apr
14
Tre
12:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
Apr 14 @ 12:00 – May 8 @ 18:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv