Rokstu sagataveja: portals lakuga.lv

Leidz 11. apreļam bārni, jaunīši i pīaugušī aicynuoti pīsadaleit literarūs i vizualūs dorbu konkursā “Tāva sāta myužam svāta”, informej konkursa idejis autore i Rēzeknis nūvoda Maltys Bārnu i jaunīšu centra (BJC) Žurnalistikys puļceņa školuotuoja Skaidrīte Svikša.

Dubultkonkursa organizatori soka paļdis tim, kas jau ir dorbus īsyutejuši, tok vys vēļ sevkurs teik aicynuots vuordūs i kruosuos viesteit par sovu dzymtū vītu i meilū sātu. Daleibnīku īdvesmei nūlykumam ir pīvīnuoti ari obeju autoru dorbu fragmenti i paraugi. Konkursā var pīsadaleit Latgolys vyspuorizgleitojūšūs školu školāni nu 1. leidz 12. klasei, 6–25 godus vaci bārnu i jaunīšu centru apmaklātuoji, kai ari individualī daleibnīki nu 20 godim i vacuoki. Paradzātys golvonuos bolvys – dators literarūs dorbu konkursā i planšetdators vizualūs dorbu konkursā, kai ari veicynuošonys i simpateju bolvys obejūs konkursūs i vysuos pīmynātajuos vacuma grupuos. Lyugums jimt vārā, ka pīaugušūs grupa ir viņ literarūs dorbu konkursā!

Dubultkonkurss teik reikuots, kab popularizēt Latgolā mozuok pazeistamu, bet ar Latgolys Maltu saisteitu personeibu, rakstneicys Veronikys Tenčys-Goldmanis i muokslinīka Jura Gaigala, radūšū davumu – poemu prozā “Pastareite” i tautysdzīšmu ilustracejis. Daleibnīkus aicynoj dubultuot īgivumus – i pīsadaleit konkursā, i izzynuot/viesteit par diveju Latgolys personeibu nūzeimi latgalīšu literaturā i muokslā. Itys konkurss teik pīduovuots ari kai dorba forma Latgolys nūvoda vuiceibys stuņdei, svynūt Latgolys kongresa dīnu 27. aprelī.
Konkursu organizej BJC, atbolsta Maltys pogosta puorvaļde, Rēzeknis Tehnologeju akademeja, V. Tenčys-Goldmanis meita Ināra Paiča, J. Gaigala meita Dace Gaigala, literaturzynuotneicys Ilgys Šuplinskys i advokata Agra Bitāna puorstuovātuo kusteiba “Ar Latgolu”, Rēzeknis Centraluo biblioteka, Latgolys Kulturviesturis muzejs, bīdreiba “Latgolys Saeima”, Latgalīšu kulturys bīdreiba i c.

Rezultati tiks paziņuoti 23. aprelī škārsteikla vītne www.malta.lv i Maltys BJC “Facebook” kontā. Lobuokūs dorbu autori tiks aicynuoti iz apbolvuošonys pasuokumu 27. aprelī (laiks i nūrise tiks precizāti, jamūt vārā epidemiologiskū situaceju vaļstī). Konkursa nūlykums daīmams ITE i kūpā ar papyldu materialim atrūnams pīmynātajuos vītnēs, kai ari saitē https://failiem.lv/u/q3cp324u9.