Jaunajā žurnalā “A12” skaitit intervejis ar keramiki Voldemāru Vogulu i reperi Ūgu
Rokstu sagataveja: portals lakuga.lv
Izguojs žurnala “A12” 2021. goda apreļa/maja numers, kurymā itūreiz var puorskaiteit sarunu ar keramikys dižmeistaru Voldemāru Vogulu, bejušū portala lakuga.lv redaktori Vinetu Vilcāni, reperi Ūgu, kurei goda suokumā spūdri sevi paruodejuse ar sajimtajim apbolvuojumim par pārņ padareitū muzykā, kai ari īpazeit cytus ļauds i vītys.
“Lai cik cīši maņ patyktu digitaluo vide i daudzuos dreižuos sapuļcis, informativūs seminarus itaidā veidā varātu reikuot ari piec pandemejis, vys tik i cīši prosuos piec kluotyn byušonys, datryukst rūkysspīdīņu, apskuovīņu, kūpā byušonys. Taids pats stuosts ir par gruomotom. Bez tūs sovu dzeivi navar īsadūmuot viesturnīks Kaspars Strods, Daina Kraukle gruomotu var izbaudeit i iztausteit, jo tei ir dzeiva, īspiejams, deļtuo ir ari mums, žurnala “A12” rodūšajim cylvākim, i jums, žurnala skaiteituojim, itys 64 puslopys ir kas vaira nikai tik presis izdavums. Ari ituo numera sarunys par latgalīšu dzeivisprīcu ari dzeivis gryutajuos dīnuos, kod jādzam prīcuotīs i par mozom i nanūzeimeigom lītom,” tai apreļa/maja žurnala “A12” īvodā soka žurnala redakcejis puorstuove Inga Čekša-Ratniece.
Apreļa/maja žurnala “A12” numerī skaitit:
• Sirsneiga i saimis sūpluok byušonys pylna saruna ar keramikys dižmeistaru, dzejnīku, Latgalīšu kulturys goda bolvys “Boņuks 2020” laureatu nominacejā par myuža īguļdejumu latgalīšu kulturys atteisteibā Voldemāru Vogulu;
• Latgalīšu volūdys entuziaste i publiciste, kai ari portala lakuga.lv ilggadeja vadeituoja i redaktore Vineta Vilcāne par mozuok lītuotajom volūdom pasaulī i iedīņa viesturi;
• Viesturnīka Kaspara Stroda ceļš da viesturis i dzeive gruomotu vydā;
• Dīnavydlatgolā austī deči i tūs pietneica Daina Kraukle;
• Kū Blontūs dora moskovīts Konstantins Belskis;
• Repere Ūga aba Daiga Barkāne – skots iz Latgolu jaunītis acim, sasnāgumi hiphopa pasaulī i saulis nesšona pasaulī;
• Rubrikā “Es i mes” – bīdreibys “Ingato” vadeituoja Inita Klindžāne par atbiļdeigu atsatīkšonu pret sātys dzeivinīkim i daugovpilītis Jana Priedīte i Tatjana Tukāne par bīdreibys “Lielas ģimenes” darbeibu.
Taipat žurnalā daudzi cytu stuostu, kurūs vydā puorskaitoma informaceja par jaunuokajom gruomotom i muzykys izdavumim, kas kai jau īrosts tūp sadarbeibā ar latgalīšu kulturys ziņu portala lakuga.lv redakceju
Vaira informacejis par žurnalu a12.lv.
