Rēzeknē pietej latgalīšu tekstu korpusa “MuLa” lītuojumu

Rēzeknē pietej latgalīšu tekstu korpusa “MuLa” lītuojumu

Rokstu sagataveja: portals lakuga.lv

Rēzeknis Tehnologeju akademejis pietnīku dorba grupa aicynoj latgalīšu volūdys lītuotuojus pīsadaleit anketiešonā par myusu dīnu latgalīšu volūdys tekstu korpusa (MuLa) lītuošonu,  informej projekta “Humanitāro zinātņu digitālie resursi: integrācija un attīstība” puorstuove Anna Briška.

Anketiešonys mierkis ir nūskaidruot, voi, cik daudz i deļkam korpuss teik lītuots, kai ari izzynuot, ar kaidom gryuteibom sasaskar korpusa lītuotuoji, kab iz prīšku varātu korpusu papyldynuot i pylnveiduot. Google vidē https://forms.gle/MqFbVCQgVb4bhSMp6 anketiešona ir pagarynuota veļ da 2021. goda 20. apreļa.

Volūdys korpuss ir strukturāts tekstu i/voi atšifrātu runys īrokstu kruojums, kas paradzāts lingvistiskai analizei. Korpuss ļaun veikt pietejumus vysaiduos zynuotņu nūzarēs, izstruoduot

gramatikys, vuordineicys, vuiceibu leidzekļus i cytus volūdys resursus i reikus, tai sekmejūt volūdys izpieti, sasaglobuošonu i atteisteibu. MuLa ir breivai daīmams divejuos vītuos škārsteiklā: http://www.korpuss.lv i http://hipilatlit.ru.lv.

Myusu dīnu latgalīšu tekstu korpuss ir vīnu miļjonu vuordlītuojumu lels. Tys ir specializāts korpuss, tuo pamatā ir konkreta tekstu grupa: Latvejā laikā nu Atmūdys da myusu dīnu (1988–2012) latgalīšu rokstu volūdā publicāti teksti. Volūdys olūti ir īkļauti nūsaceituos proporcejuos atbylstūši latgalīšu rokstu volūdys lītuojuma specifikai, leidz ar tū korpuss ir leidzsvoruots. Kotram tekstam ir dalykti bibliografiskī metadati.

MuLa ir īkļauti treis tekstu veidi: literarī teksti (dailliteratura, dokumentaluo literatura i c.), tehniski specialī teksti (zynuotniskī, popularzynuotniskī, lītiškī teksti i c.) i informativī teksti (publicistika, zinis i c.). Deļ korpusa tyka atlaseiti piec īspiejis vairuok latgaliski rokstūšūs autoru – Marutys Latkovskys, Lidejis Leikumys, Ontona Kūkoja, Annys Rancānis, Ontona Slišāna, Oskara Seiksta, Juoņa Elkšņa, Valentina Lukaševiča, Ilzis Spergys, Cyxob, Pluociņu Masis, Anša Ataola Bierzeņa, Jura Viļuma, Edeitis Husaris, Egitys Terēzis Jonānis, Raibuo, Vitys Briškys, Gunta Rasima i daudzeju cytu, pavysam ap 390 autoru, teksti.

MuLa tyka izstruoduots nu 2010. leidz 2012. godam projektā “HipiLatLit”, sasadorbojūt Rēzeknis Augstškolai, Vītauta Dyžuo universitatei i Latvejis Universitatis Matematikys i informatikys institutam. Bet kūpš 2020. goda oktobra Rēzeknis Tehnologeju akademejis pietnīku dorba grupa kūpdarbeibā ar vēļ ostonim partnerim realizej projektu “Humanitarūs zineibu digitalī resursi: integraceja i atteisteiba” (vaira informacejis: https://www.rta.lv/aktualitates/2588/, https://www.rta.lv/aktualitates/2626/). Par div godim plānuots izpiļdeit aizdavumus, kas īvarojami sakmātu humanitarūs zineibu resursu atteisteibu, ilgtspieju un pīlītuojumu. Vīns nu mierķu ir MuLa papyldynuošona ar tekstim, kas publicāti piec 2012. goda rudiņa.

Print Friendly, PDF & Email

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]