Ituo pavasara Dagnejis dzeja

Ituo pavasara Dagnejis dzeja

Sagataveja: Ilze Sperga i portals lakuga.lv

Itei nav pyrmuo Dagnejis dzejis publikaceja portalā lakuga.lv. Itūšaļt jei atsazeist, ka sapludynoj lauku dzeivi ar sabīdryskajom aktivitatem voi piļsātu, voi datoru dorbim…  Tū rauga salikt ari dzejūļūs. Interveju ar Dagneju skaitit ITE.


***

itūvokor nakts naatīs tik mudri
atpakaļ skota spīgeļam
izbiers stikleņš
pi rulonu pastateits baidāklys
kompaktdiski
īroksta vairs tik dabasus
dūmuoju tuoļumā kaids spēlej bumbu
izaruoda teli
ar astem syt sev pa suonim
skaņ taišni kai servis
volejbolā
apleik tik kolni
i uobuļneicys
vacajuos sātu vītuos
saimineica dzan slauktīs gūvs
izaruoda paskrīt var ari ar sapeitom kuojom
itymā sātā vysi stuņdinīki
napareizi ruoda


***

gaidu tevi vakareņuos
jau ūtrū stuņdi
aizsyutu sms
voi byusi
atīt viests
ka esi sastrāgumā
nazini vaira
ceļa da sātai
rokstu ka
dzeraunē
sastrāgumu
navā
atīt viests
ar itaidu simbolu
😂
atej meiluo
iz ūtru ustobu… 💕


Saimis dzeivis seikumi

Pušnaktī deļ veira cept kotletus
Ir normala paruodeiba.
Vakarenis i brūkastis reizē,
Kai vajaga – pyrma sešu.
Paprosu, voi jam ir loba sīva.
Jis atsoka, ka cīši loba,
Ka var myus sapazeistynuot.
Lobs jūks, es soku.
I verūs kai jis atkūž kotletu,
Kuram speciali dabieru cukru.
Lobs jūks, pareizi?
Tai i dzeivojam –
Sovs pīneņš, sova galeite,*
Tik par jautreibu juoguodoj pošim.

*Folkloriziejīs Raibuo teicīņs.


Atmiņu smuords

Piec lelim syudim mozī aizamierst.
Tys, kurs goris redziejs pa eistam, prūt prīcuotīs.
Apviļkt kažuku, izlikt ausaini,
Nūbrist iz mežu piec molkys.
Timseņā atīt iz sātu, luoča maize kuldā deļ bārnu.
Papraseit paleigūs nūraut valenkus,
Pakuort autus kuknē pi čiteņa.
Nasaceit nivīna vuorda par soltumu, gryutumu, zīmu.
Pajemt kliepī i – rikšim, rikšim, aulekšim…
Pastuosteit par Lauski, kurs sporduos par pakšim.
Nūvest paruodeit dūbeiti, kur guliejs ir začs.
Vokorā izsegt sovu kažuku, lai soldonuoks mīgs.
Tys šaļtim piec bierneibys i poša
Vacjuka smuordoj.


***

Atej šur par siermū stuņdi
Pasēdēsim sūpluok iz slīkšņa
Īvuiceišu tev dzert sātys olu

Īlīt nu leluo ižbuona
Lai naiztak ni lase

Vieršūs tevī cīši cīši
Ar cereibu saprast

Kurs kuruo
Dūmys mes skaitom

Es tevi mīļoju vysu dīnu


***

Lads jau ir nūguojs
Iz postu pēc konverta.
Paprasejs raudivem
Pīraksteit atvodu viestuli zīmai.
Juos ceņteigi roksta
Ar sovom dzaltonajom pleznom
Iz munys sirds pavasari.
Pādejūs vuordus īskruopej dyktuok –
See you!
Papraseja mani tū nūsyuteit zīmai,
Es nazynu, kur jei dzeivoj.
Salūceju lidmašynā
I īsvīžu nu tylta iudinī,
Tei beja šmukuokuo
Aviokatastrofa viestulē –
See you!


***

Tymā vokorā
Mes guni tai ari nasakiurem
Daugovys krostā
Maņ kuldā jau beja smaļaceni i tuostenis
Piļsātā tūs gryuši dabuot
Septeņus riņčus staiguojom
Pa parku tik
Napuorguojom puori dambam

Labi ka napuorguojom
Labi ka narezerviejom vīsneicu
Labi ka nūbučuoji iz byuda


***

ar vokoru siežam pi guņskura
gaidom sovys atīšonys
siermuo stuņde mums aizvuorej čaja
(jei ir muna lobuokuo draudzine)
lindraki jai gari da zemei
blūzis pūdzenis tik kai damastys
ka jei atguozus golvu smejās
ruodīs vyss tyuleņ byus valī
es izalīku ka naradzu kai
vokors iz juos verās
aizīt jī kūpā zam rūkys
taišni iz nakti

maņ sūpluok jau
reits

Print Friendly, PDF & Email

Nūtikšonu kalendars

May
24
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
May 24 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
May
25
Tre
16:00 Maja dzīduojumi pi krysta ar etn... @ Vabalis krysts
Maja dzīduojumi pi krysta ar etn... @ Vabalis krysts
May 25 @ 16:00 – 17:30
Majs katuoļu bazneicys kalendarā ir Svātuos Jaunovys Marijis mieness – laiks, kod Vabalē teik izpuškuoti ceļa molys krysti i nūteik maja dzīduojumi. Ari itūgod, saglobojūt vīnu nu namaterialuo kulturys montuojuma tradiceju, pogosta ļauds teik aicynuoti[...]
May
26
Cat
19:00 Daņču vokors ar folklorys kūpu “... @ Augšdaugovys nūvoda kulturys centrs "Vārpa"
Daņču vokors ar folklorys kūpu “... @ Augšdaugovys nūvoda kulturys centrs "Vārpa"
May 26 @ 19:00 – 21:00
Daņču vokors ar folklorys kūpu "Dyrbyni" @ Augšdaugovys nūvoda kulturys centrs "Vārpa"
Leidza: ārtys mainis kurpis doncuošonai, dzeramais iudiņs. Daleiba breiva.
May
27
Pīk
15:00 Diskuseja par Latgolys parka att... @ Reiga
Diskuseja par Latgolys parka att... @ Reiga
May 27 @ 15:00 – 17:30
Diskuseja par Latgolys parka atteisteibu @ Reiga
Reigys dūme piec latgalīšu navaļstiskūs organizaceju rūsynuojuma lāmuse Moskovys duorzu Reigā puorsaukt par Latgolys parku. Kab dūmuotu, kai reizē ar itom puormaiņom parku padareit par pīviļceiguoku teritoreju i īspieju reidzuonim car tū vaira izzynuot par[...]
20:00 Jura Ostrovska koncerts @ Tiļžys kulturys i viesturis noms
Jura Ostrovska koncerts @ Tiļžys kulturys i viesturis noms
May 27 @ 20:00 – 22:00
Jura Ostrovska koncerts @ Tiļžys kulturys i viesturis noms