Rokstu sagataveja: portals lakuga.lv

Pyrma diveju godu pyrmū reizi tyka organizāts dzīduotuojis i dzīšmu autoris Aijis Erenis (1985–2017) pīminis konkurss jaunajim solistim i dzīšmu autorim “Nūdreb sirds“. Beja īceris konkursu reikuot reizi divejūs godūs, nu vys tik pandemejis ītekmis deļ konkursa ituo goda majā nabyus, bet organizatori – Eriņu saime – planavoj tū taiseit par reizi tod, kod byus taida apstuokļu vareiba.

Pyrmajā Aijis Erenis pīminis konkursā 2019. godā pīsadaleja jaunī solisti, dzīšmu autori i literarūs dorbu raksteituoji na tik nu Latgolys, bet ari nu cytu Latvejis vītu. Vokalistu konkursa dalinīki izpiļdeja div dzīsmis – tautysdzīsmi i breivys izvēlis skaņdorbu a capella ci ar pavadejumu. Jūs žureja vērtēja treis vacuma grupuos: “Cuoleiši“ (4–8 godi), “Ceiruleiši” (9–13 godi) i “Laksteigolys“ (14–19 godi). Dzīšmu autoru originaldzīšmu konkursā (9–19 godi) varēja pīsadaleit ar vīnu dzīsmi, kū varēja izpiļdeit pats autors, cyts solists ci ansamblis, kai ari literaruos jaunradis konkursa (9–19 godi) dalinīki raksteja eseju par temu “Mana dzimtene – Latvija” ci ari sovu breivi izalaseitu temu.

Dūmojūt par konkursa ūtrū nūtikšonys reizi, Eriņu saime izplatejuse viesti, ka pandemejis deļ vys tik konkurss ituo goda majā nanūtiks: “Vēļ decembrī, janvarī ar cereibom dūmuojom par pandemejis leluma sasamazynuošonu. Puorcēlem konkursa informacejis izsludynuošonu i pīsasaceišonys aicynuojumu, nu vys tik, situacejai nauzalobojūt, daguoja pījimt lāmumu, ka majā konkurss nanūtiks. Apdūmuojom ari variantu par attuolynuotu konkursa nūtikšonu, nu, tai kai konkursa mierkis nav izzynuot lobuokūs, bet veicynuot mozūs sirsneņu drebiešonu i sasajimšonu publikys i žurejis prīškā, kūpābyušonu bārnu vacuokim, pedagogim, kuri gatavejuši jaunūs talantus izīšonai iz skotivis. Deļtuo itaidu attuolynuotuo formata ideju atcēlem. Gaideisim, kod varēsim sasatikt koncertūs, skatēs, lelūs svātkūs – tod ari tū varēsim konkursā. Cerejam sasatikt i sasadzīduot dreiž!“

Dzīduotuoja i dzīšmu autore Aija Eriņa, kurys dzymtuo puse beja Drycāni, myužeibā nūguoja pieški 2017. goda vosorā. Leluoku atpazeistameibu Aija dabuoja kai TV šova “Latvejis talants 2008“ uzvarātuoja i kod kūpā ar saimi pīsadaleja šovā “Dzīduošuos saimis“. Aijis bolss ar daudzom popularom dzīsmem skaniejs Latvejis radeju stacejuos, kai solomuokslineica i kūpā ar sovu saimi sovulaik snēgusi vaira nikai 100 koncertu vysā Latvejā. Piec dzīduotuojis nūīšonys myužeibā juos padareitais tyka apkūpuots i izdūts divejūs albumūs – “Par martu, maiju un decembri“, kurā īkļautys 11 dzīsmis i tuo kūdulu veidoj Aijis Erenis i Valda Metlāna treis godu laikā kūpeigi komponātuos dzīsmis ar Ojāra Vācieša i Klāva Elsberga dzeju, kai ari Aijis tekstim. Taipat Aijis tāva Andra Eriņa sakuortuots izguoja dubultalbums: “Aija Eriņa. Izlase“, kurā īkļauti 19 solodzīduojumi, dzīsmis kūpā ar dzīdūšū Eriņu-Vorkaļu saimi, kai ari koncertīroksti, bet ūtrajā daļā “Nepaspēju“ 16 īskiciejumi i nadabeigtī dorbi.